თბილისი, 10 დეკემბერი — Sputnik. სამართალდამცველებმა თბილისში ყაჩაღობის ბრალდებით 24 წლის მამაკაცი დააკავეს, იუწყება შსს-ს პრესსამსახური.
შსს-ს ცნობით, ამჟამად დაკავებული ახალგაზრდა მიმდინარე წლის 8 დეკემბერს თბილისში, ნუცუბიძის ქუჩაზე მდებარე ერთ-ერთ სუპერმარკეტში შევიდა, მოლარეს შუშის გატეხილი ბოთლის მუქარით გარკვეული თანხა გასტაცა და მიიმალა. მეორე დღეს, 9 დეკემბერს იგივე პირი ფანასკერტელის ქუჩაზე მდებარე სუპერმარკეტში დაესხა თავს მოლარეს, დანის მუქარით თანხა გასტაცა და შემთხვევის ადგილიდან ისევ მიიმალა.
შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს სამმართველოს თანამშრომლებმა ბრალდებული 10 დეკემბერს მისსავე საცხოვრებელ სახლში დააკავეს.
სისხლის სამართლის საქმე აღძრულია სსკ-ის 179-ე მუხლით (არაერთგზის ჩადენილი ყაჩაღობა), რაც 8-დან 12 წლამდე თავისუფლების აღკვეთას ითვალისწინებს.
