თბილისი, 24 ნოემბერი — Sputnik. პარასკევს თბილისის მეტროპოლიტენის ახმეტელი-ვარკეთილის ხაზის მუშაობა პარალიზებული იმის გამო იყო, რომ შუახნის მამაკაცი მეტროსადგურ „დიდუბეში“ მატარებელს ჩაუხტა, განუცხადეს „Sputnik-საქართველოს“ თბილისის სატრანსპორტო კომპანიაში.
მამაკაცი გადარჩა, მაგრამ სხეულის დაზიანებები მიიღო და ის საავადმყოფოში გადაიყვანეს.
დროებით დაიკეტა ღრმაღელის, დიდუბის, გოცირიძის და ნაძალადევის სადგურები. მატარებლები მოძრაობდა სადგურ „ახმეტელის სადგურიდან“ „გურამიშვილამდე“ და „სადგურის მოედნიდან“ „ვარკეთილამდე“.
ამჟამად მეტროპოლიტენის მუშაობა აღდგა.
„ის გადარჩა, მაგრამ სხეულის დაზიანებები მიიღო. მოხდა დროული რეაქცია და ძაბვა გაითიშა. ადგილზე სასწრაფო სამედიცინო დახმარება გამოიძახეს, და დაზიანებებიდან გამომდინარე, დაშავებული საავადმყოფოში გადაიყვანეს. ადგილზე პოლიცია იყო მობილიზებული“, — განაცხადა თბილისის სატრანსპორტო კომპანიის თანამშრომელმა.
მომხდარი შსს-ს პრესსამსახურშიც დაადასტურეს და განაცხადეს, რომ მოგვიანებით მოაწვდიან ინფორმაციას იმის შესახებ, რა მუხლით აღიძრება სისხლის სამართლის საქმე.
