თბილისი, 22 ნოემბერი — Sputnik. ის ადამიანები, რომელთა წინააღმდეგაც თბილისში უკვე 17 საათია სპეცოპერაცია მიმდინარეობს, უკვე ორი წელია გაბრიელ სალოსის ქუჩაზე, მითითებულ მისამართზე ცხოვრობენ, ამის შესახებ ჟურნალისტებს კორპუსის ევაკუირებულმა მცხოვრებლებმა უთხრეს.
მათი განცხადებით, ეჭვმიტანილები უცხოელები არიან და მანამდე რაიმე საეჭვო ქმედება ამ პირების მხრიდან არ შეუმჩნევიათ.
კორპუსის მაცხოვრებელთა თქმით, სროლები ორმხრივი იყო და შტურმის შედეგად დაზიანებულია საცხოვრებელი ბინები კორპუსის მეორე და მესამე სართულზე.
ორი ეჭვმიტანილის დაკავების სპეცოპერაცია თბილისში ბერი გაბრიელ სალოსის ქუჩაზე გასული საღამოდან მიმდინარეობს. ეჭვმიტანილები ბერი გაბრიელ სალოსის ქუჩაზე საცხოვრებელი კორპუსის ერთ-ერთ ბინაში იმყოფებიან, სადაც ორი ბინა იწვის.
ადგილზე არ წყდება სროლა, პერიოდულად ისმის აფეთქებების ხმა.
ბოლო ინფორმაციით, დაიჭრა ერთი სპეცრაზმელი, რომელიც უკვე საავადმყოფოშია გადაყვანილი. დაუდასტურებელი ინფორმაციით, კიდევ ორი ადამიანი დაშავდა.
