თბილისი, 26 სექტემბერი — Sputnik. შარტავას ქუჩაზე, ერთ-ერთი სახლის სადარბაზოში მძიმედ დაჭრილი მამაკაცი იპოვეს, რომელიც შსს-ს თანამშრომელი აღმოჩნდა, იუწყება საზოგადოებრივი მაუწყებლის პირველი არხი.
ადგილზე მისულ პოლიციელებს მამაკაცი გარდაცვლილი ეგონათ და სისხლის სამართლის საქმე აღძრეს სსკ-ის მუხლით "თვითმკვლელობამდე მიყვანა", თუმცა მედიკოსებმა დაადგინეს, რომ მამაკაცი ცოცხალია და ის საავადმყოფოში გადაიყვანეს.
ამჟამად მამაკაცი ძალზე მძიმე მდგომარეობაში რესპუბლიკური საავადმყოფოს რეანიმაციულ განყოფილებაში იმყოფება.
ამავდროულად, მასმედიამ დაადგინა, რომ დაჭრილი საქართველოს შსს-ს მომსახურები სააგენტოს მაღალჩინოსანი ზურაბ ტაკიძეა.
შსს-ში ადასტურებენ, რომ დაჭრილი მათი უწყების თანამშრომელია, თუმცა ვინაობას არ ასახელებენ.