თბილისი, 17 ივლისი — Sputnik. ინტერპოლის თბილისის ბიუროსა და საქართველოს შსს-ს საპატრულო პოლიციის თანამშრომლებმა დააკავეს ისრაელის მოქალაქე, რომელსაც მადრიდის ბიურო 2007 წლიდან ეძებდა, ნათქვამია უწყების ვებ-გვერდზე განთავსებულ განცხადებაში.
ისრაელის მოქალაქე თბილისის საერთაშორისო აეროპორტში ისრაელიდან საქართველოში შემოსვლისას დააკავეს.
დაკავებულ დ. შ.-ს (დაბადებული 1974 წელს) ესპანეთის პროკურატურა ბრალს სდებს ვალუტისა და საგადასახადო შტამპების გაყალბებაში.
შსს-ს პრეს-სამსახურის ინფორმაციით, ამჟამად დაკავებულის მიმართ მიმდინარეობს კანონით გათვალისწინებული წინასაექსტრადიციო პროცედურები.
