თბილისი, 24 მაისი — Sputnik. შინაგან საქმეთა სამინისტრომ ქალაქ რუსთავსა და გარდაბნის რაიონის სოფელ გაჩიანში ორი ჩვილის გარდაცვალებასთან დაკავშირებით სისხლის სამართლის საქმეები აღძრა, იუწყება საინფორმაციო სააგენტო Новости-Грузия უწყების პრეს-სამსახურზე დაყრდნობით.
სამშაბათს, გამთენიისას ორი გოგონა გარდაიცვალა. ერთი მათგანი ერთი თვისაც არ იყო, ხოლო მეორე — ოდნავ უფროსი.
ბავშვები ერთი საათის ინტერვალით მიიყვანეს რუსთავის საავადმყოფოში, მაგრამ ისინი უკვე გარდაცვლილი იყვნენ, იუწყება ტელეკომპანია Imedi.
სისხლის სამართლის საქმე აღძრულია სსკ-ის მუხლით "სიცოცხლის მოსპობა გაუფრთხილებლობით", რაც ისჯება თავისუფლების შეზღუდვით ხუთ წლამდე ან თავისუფლების აღკვეთით ორიდან ოთხ წლამდე.
