თბილისი, 18 მაისი — Sputnik. შეფერხებული იყო ავტოსაგზაო მოძრაობა გვიან ღამით საპორტო ქალაქ ფოთში, რისი მიზეზიც პალმის ხე გახდა, რომელიც ყოფილი პრემიერის ბიძინა ივანიშვილის აგარაკზე დასარგავად გადაჰქონდათ, იუწყება ტელეკომპანია Rustavi2.
ტელეკომპანიის ცნობით, მოზრდილი მცენარე, რომელიც ივანიშვილმა არგენტინაში შეიძინა და რომელიც ფოთის პორტიდან შეკვეთილში, ივანიშვილის აგარაკზე გადაჰქონდათ, ტრანსპორტირებისას გადმოვარდა.
ხე, შეფუთულ მდგომარეობაში, სატვირთო ავტომანქანის მისაბმელზე იყო დამაგრებული. სავარაუდოდ, მისაბმელზე სიმძიმე არასწორად იყო განაწილებული, რის გამოც ერთ-ერთ მოსახვევში მისაბმელი ამოტრიალდა.
პალმის ხე ამჟამად იმ გადამზიდავი კომპანიის ტერიტორიაზეა განთავსებული, რომელმაც უნდა უზრუნველყოს მისი ტრასპორტირება.
