თბილისი, 21 აპრილი — Sputnik. შინაგან საქმეთა სამინისტროს კუთვნილი ავტომობილი ფანასკერტელის ქუჩაზე რვა მეტრის სიმაღლიდან გადავარდა და საცხოვრებელი კორპუსის ეზოში გაჩერებულ მანქანას დაეცა, იუწყება ტელეკომპანია Rustavi2.
ინციდენტი პარასკევს, გამთენიისას მოხდა. ავტომობილი, რომელსაც შსს-ს ბალანსზე მყოფი მანქანა დაეცა, ძლიერ დაზიანდა. ინციდენტის დროს არავინ დაშავებულა, იუწყება საინფორმაციო სააგენტო Новости-Грузия შსს-ს ინფორმაციაზე დაყრდნობით.
ადგილობრივი მცხოვრებლები აცხადებენ, რომ მათი ეზოს თავზე გადის გზა, რომელსაც დამცავი ჯებირები არა აქვს და ეს ავტომობილის გადმოვარდნის პირველი შემთხვევა არ არის.