თბილისი, 22 მაისი — Sputnik. ბათუმის კლინიკური საავადმყოფოს თერაპიული განყოფილების ხელმძღვანელმა ბენო ჭელიძემ მომხრეებთან ერთად საავადმყოფოს ეზოში კარვები გაშალა – ის ახალი შენობის ტექნიკურად აღჭურვის სასწრაფოდ დასრულებასა და მედპერსონალის მუშაობის აღდგენას მოითხოვს, იუწყება ტელეკომპანია Imedi.
ჭელიძე არ გამორიცხავს, რომ პროცესი ხელოვნურად ჭიანურდება, რადგან ერთ-ერთი კერძო კომპანია საავადმყოფოს შესყიდვით არის დაინტერესებული. ამასთან დაკავშირებით ექიმმა 25 მაისს საპროტესტო აქცია დააანონსა.
აჭარის ჯანდაცვის სამინისტრომ კლინიკის გაყიდვის შესახებ ინფორმაცია უარყო. უწყების ცნობით, საავადმყოფო სახელმწიფო დაწესებულებად დარჩება.
განახლებული რესპუბლიკური საავადმყოფო ჯერ კიდევ 2018 წლის გაზაფხულზე უნდა გახსნილიყო. ის 21,5 ათას კვადრატულ მეტრ ფართობს მოიცავს.
პროექტის თანახმად, მრავალპროფილური საავადმყოფო უნდა შედგებოდეს რამდენიმე ბლოკისგან და სტაციონარში 170 ადამიანის მისაღებად იყოს მზად.
