თბილისი, 25 ოქტომბერი — Sputnik. საქართველოს პარლამენტი იხილავს ადმინისტრაციულ სამართალდარღვევათა კოდექსში შესატან ცვლილებებს, რომელთა თანახმად საგზაო მოძრაობის წესების დარღვევისთვის ახალი სანქციები წესდება.
კანონპროექტის ავტორები არიან მმართველი პარტია „ქართული ოცნება — დემოკრატიული საქართველოს" დეპუტატები კახა კუჭავა და გოგა გულორდავა. კანონპროექტი უკვე განხილულია პარლამენტის ბიუროს სხდომაზე, რომელმაც დადებითი რეკომენდაცია გასცა და შესაბამის კომიტეტებს მისი განხილვა დაავალა.
ცვლილებების თანახმად, ადმინისტრაციულ სამართალდარღვევათა კოდექსის 125-ე მუხლს რამდენიმე ნაწილი ემატება. კერძოდ, თუ მანქანის მფლობელმა მანქანა უმეთვალყუროდ სამ თვეზე მეტი ვადით დატოვა, ის 50 ლარით დაჯარიმდება.
BUS LANE-ზე მოძრაობა, გაჩერება ან პარკინგი (სამარშრუტო ტაქსების გარდა) 100-ლარიან ჯარიმას გამოიწვევს.
ველობილიკზე მოძრაობა, გაჩერება ან პარკინგი 50-ლარიან ჯარიმას ითვალისწინებს.
ზემოაღნიშნულ შემთხვევებში მანქანას სპეციალურ სადგომზე გადაიყვანენ, მისი წაყვანა კი მფლობელს მანქანის გადაყვანისა და სადგომზე შენახვისთვის გაწეული ხარჯების გადახდის შემდეგ შეუძლია.
100-ლარიან ჯარიმას ითვალისწინებს სახელმწიფო სანომრე ნიშნის ან ნიშნების, სატრანზიტო, შიდა სატრანზიტო ან TEST-ნომრის გარეშე მანქანის გაჩერება ან პარკინგი.
ამ შემთხვევაშიც ავტომობილი გადაჰყავთ სადგომზე, თუმცა თუ გაირკვა, რომ მფლობელს სანომრე ნიშნები მოპარეს, ის თავისუფლდება ჯარიმისა და სადგომის ხარჯების გადახდისგან.
1 ივლისიდან საქართველოში ამოქმედდა ე.წ. ქულების სისტემა — მძღოლის მართვის მოწმობაზე დაირიცხა 100 ქულა, რაც, დარღვევების შემთხვევაში, თანდათან მცირდება. ლიმიტის ამოწურვის შემდეგ მძღოლს მართვის მოწმობას ჩამოართმევენ. თავდაპირველად ქულები ნახევარ წელზე იქნება გათვლილი, ანუ 2017 წლის ბოლომდე, მომავალში კი — ერთ წელზე.
1 ნოემბრიდან საქართველოში ე.წ. ჭკვიანი კამერები ჩაირთვება, რომლებიც სამართალდარღვევას დააფიქსირებენ და ჯარიმას გამოწერენ. "ჭკვიანი კამერების" დამონტაჟება წლის ბოლომდე გაგრძელდება. სულ 3 000-მდე ასეთი კამერა დამონტაჟდება. კამერები თავიდან თბილისში, ბათუმსა და ქუთაისში, ასევე დასავლეთ და აღმოსავლეთ საქართველოს დამაკავშირებელ ავტობანზე გაჩნდება.
გზებზე კონტროლის გამკაცრება მას შემდეგ გახდა საჭირო, რაც საქართველოში საგზაო-სატრანსპორტო შემთხვევების რიცხვმა იმატა. ქვეყანა გზებზე სიკვდილიანობის მაღალი რისკის მქონე ქვეყნების ათეულში მოხვდა. ბოლო სამი წლის განმავლობაში საქართველოში ავარიების დროს 3 000-მდე ადამიანი დაშავდა.
