ბაქოში ჰეიდარ ალიევის სახელობის საერთაშორისო აერპორტში სამშაბათს ღამით სპეცრეისით გადაიყვანეს ბლოგერი ალექსანდრ ლაპშინი. იხილეთ Sputnik აზერბაიჯანის ფოტოლენტა, თუ როგორ გადაყავთ ბლოგერი ბაქოს აეროპორტში.
ბელარუსის უზენაესი სასამართლოს გადაწყვეტილებით ალექსანდრ ლაპშინი ექსტრადირებულია აზერბაიჯანში. სამშაბათს ღამით ლაპშინი სპეცრეისით გადააფრინეს ბაქოში, ჰეიდარ ალიევის სახელობის საერთაშორისო აეროპორტში. მანამდე ბლოგერი აზერბაიჯანის მთავრობის მოთხოვნით მინსკში დააკავეს. ბაქოში ის ხელბორკილით გადაიყვანეს.
ალექსანდრ ლაპშინი არაერთხელ წასულა ყარაბაღის ტერიტორიაზე ოფიციალურ ბაქოსთან შეთანხმების გარეშე, რის გამოც ის 2011 წელს აზერბაიჯანის საგარეო საქმეთა სამინისტროს "შავ სიაში" აღმოჩნდა. გარდა ამისა, ბლოგერი ბრალდებულია "სახელმწიფო საზღვრების" შესახებ კანონის დარღვევაში იმიტომ, რომ გასული წლის ივნისში აზერბაიჯანის ტერიტორიაზე შევიდა საქართველოს ტერიტორიიდან უკრაინული პასპორტით, იუწყება Sputnik აზერბაიჯანი.
ლაპშინის წინააღმდეგ აზერბაიჯანში აღძრულია სისხლის სამართლის 2 საქმე, სისხლის სამართლის კოდექსის 281.2 მუხლით (სახელმწიფოს წინააღმდეგ მიმართული მოწოდებები) 5-დან 8 წლამდე თავისუფლების აღკვეთით და 318.2 მუხლით (აზერბაიჯანის სახელმწიფო საზღვრის უკანონოდ გადაკვეთა), რაც 5 წლამდე თავისუფლების აღკვეთას ითვალისწინებს. აზერბაიჯანის ხელისუფლებამ ბლოგერი საერთაშორისო ძებნაში გამოაცხადა.
აზერბაიჯანის კანონმდებლობის მიხედვით, გასამართლების შემთხვევაში ორივე მუხლით გათვალისწინებული სასჯელი არ შეიკრიბება და ბრალდებულს მიესჯება კანონით გათვალისწინებული სასჯელის მაქსიმალური ოდენობა.