თბილისში, თავისუფლების მოედანზე, "საქართველოს ბანკის" შენობის წინ საპროტესტო აქცია გამართეს ქიმიური ქარხანა "რუსთავის აზოტის" სამსახურიდან გათავისუფლებულმა თანამშრომლებმა. იხილეთ „Sputnik–საქართველოს“ ფოტომასალა, თუ როგორ მიმდინარეობდა საპროტესტო აქცია, რომლის გამოც თავისუფლების მოედანზე საავტომობილო მოძრაობა გადაიკეტა.
საპროტესტო აქციის მონაწილეები, დაახლოებით 100 ადამიანი, ვარდების მოედანზე შეიკრიბნენ და მსვლელობა მოაწყვეს რუსთაველის გამზირის გავლით თავისუფლების მოედანზე, "საქართველოს ბანკის" შენობამდე. მომიტინგეები გზის სავალ ნაწილზე გადაადგილდებოდნენ და ტრანსპორტის მოძრაობას აფერხებდნენ.
საპროტესტო აქციაში ქიმიური ქარხნის ყოფილ თანამშრომლებთან ერთად მონაწილეობდნენ საქართველოს გაერთიანებული პროფკავშირების და არასამთავრობო ორგანიზაციების წარმომადგენლები და სტუდენტები.
აქციის მონაწილეებს მიაჩნიათ, რომ ქარხნის თანამშრომლების გათავისუფლებაზე პასუხისმგებელი "საქართველოს ბანკის" ხელმძღვანელობაა. საქმე ისაა, რომ "საქართველოს ბანკის" მფლობელობაშია სააქციო საზოგადოება EU Investment, რომელიც 2016 წლის სექტემბერში "რუსთავის აზოტის" 100% წილის მფლობელი გახდა. ახალი ხელმძღვანელობის პირობებში იანვარში შემცირებაში მოყვა 350 ადამიანი.