თბილისი, 28 აპრილი – Sputnik. აჭარის მთავრობა კორონავირუსის ინფექციასთან ბრძოლისთვის 20 მილიონ ლარზე მეტს გამოყოფს და მას გაანაწილებს როგორც საკარანტინო ზონებზე, ისე ჯანდაცვის მარაგების შევსებაზე, განაცხადა ბრიფინგზე აჭარის მთავრობის თავმჯდომარემ თორნიკე რიჟვაძემ.
მისი თქმით, საგანგებო ბიუჯეტზე მუშაობა უკვე დასრულდა და მისი პროექტი განსახილველად და დასამტკიცებლად უმაღლეს საბჭოს გადაეცა.
აჭარის მთავრობის გეგმაშია რეგიონის შეჭირვებული მოსახლეობის უზრუნველყოფა სასურსათო კალათებით. საუბარია 10 ათას ბენეფიციარზე.
სოფლის მეურნეობის დახმარება
როგორც რიჟვაძემ განაცხადა, მნიშვნელოვანი მიმართულება, რომლის მხარდაჭერასაც ხელისუფლება აპირებს, სოფლის მეურნეობაა.
„აჭარაში ყველა გლეხს, ყველა ფერმერს ექნება მაქსიმალური ხელშეწყობა როგორც სოფლის მეურნეობის განვითარების კუთხით, ასევე პირველადი სასურსათო წარმოების კუთხით“, – განაცხადა რიჟვაძემ.
ამას გარდა, ქვეყნის ხელისუფლებამ უკვე განაცხადა, რომ სოფლის მეურნეობას 50 მლნ ლარით დააფინანსებს. კერძოდ, სახსრები მიმართული იქნება თითოეული ფერმერისთვის 30 ათასამდე ლარის ოდენობის გრანტის წარდგენაზე.
სახელმწიფო პროექტ „აგროკრედიტის“ ფარგლებში 5 ათასი ბენეფიციარის ერთწლიან კულტურებთან მუშაობისთვის გაცემული სესხების პროცენტებს მთლიანად დაფარავს.
გარდა ამისა, 2020 წელს სოფლის მეურნეობას გაათავისუფლებენ მელიორაციის გადასახადისგან და დავალიანებას ამ მუხლით ჩამოაჭრიან.
ტურიზმის დახმარება
აჭარის მთავრობა საქართველოს ცენტრალურ ხელისუფლებასთან ერთად ტურისტული დარგის დახმარებისა და სტიმულირების გეგმაზე მუშაობს, რაც ამ სექტორის მდგრადობის შენარჩუნებას შეუწყობს ხელს.
„გარდა უკვე წარდგენილი შეღავათებისა და ანტიკრიზისული გეგმისა, ყველანი ვთანხმდებით, რომ ტურიზმის სექტორთან მიმართებით არსებული შეღავათები არ არის საკმარისი“, – აღნიშნა რიჟვაძემ.
კორონავირუსის პანდემიის გამო ერთ-ერთი პირველი საქართველოში ტურისტული სექტორი დაზარალდა. მის დასახმარებლად საქართველოს მთავრობამ ქონებრივი და საშემოსავლო გადასახადების 1 ნოემბრამდე გადავადება გადაწყვიტა. ამ შეღავათებით უკვე ისარგებლა ამ ბიზნესის 4,5 ათასმა წარმომადგენელმა. გადავადდა 90 მლნ ლარის ვალდებულება.
მთავრობამ მცირე სასტუმროების საბანკო კრედიტების ექვსთვიანი საპროცენტო განაკვეთის 80%-ის სუბსდირებაც მოახდინა.
