თბილისი, 13 დეკემბერი — Sputnik. საქართველოს სავაჭრო-სამრეწველო პალატის პრეზიდენტი გიორგი პერტაია „აბრეშუმის გზის“ საერთაშორისო სავაჭრო პალატის (SRCIC) ვიცე-პრეზიდენტი გახდა, ნათქვამია საქართველოს სავაჭრო-სამრეწველო პალატის განცხადებაში.
ჩინეთში 7 დეკემბერს გაიმართა ღონისძიება ფორმატით „ერთი სარტყელი – ერთი გზა", რომელშიც 73 ქვეყნიდან 400 დელეგატი მონაწილეობდა. მათ შორის იყვნენ დიპლომატები, საერთაშორისო ორგანიზაციების, ბიზნეს-ასოციაციებისა და მთავრობების წარმომადგენლები.
პრემიერი: საქართველო ახალი „აბრეშუმის გზის" ინიციატივაში მონაწილეობით ამაყობს>>
„აბრეშუმის გზის“ საერთაშორისო პალატა 2015 წელს საერთაშორისო სავაჭრო პალატამ (ICC), სავაჭრო პალატების მსოფლიო ფედერაციამ (WCF) და „აბრეშუმის გზის“ სავაჭრო პალატებმა დააფუძნეს. პალატა ფოკუსირებულია სტრატეგიაზე „ერთი სარტყელი – ერთი გზა" და წევრი კომპანიების საჭიროებებზე, ქმნის საერთაშორისო, შიდა ეკონომიკისა და სავაჭრო თანამშრომლობის ახალ პლატფორმას.
„აბრეშუმის გზის“ საერთაშორისო პალატის წევრთა რიცხვი ოთხ წელიწადში 2018-მდე გაიზარდა. ის წარმოადგენს მსოფლიოს 82 ქვეყანას. მასში მილიონობით შვილობილი საწარმო შედის.
საქართველოს სავაჭრო-სამრეწველო პალატა SRCIC-ს წევრი 2016 წელს გახდა.
საქართველო იყო ერთ-ერთი პირველი ქვეყანა, რომელიც გამოეხმაურა ჩინეთის პრეზიდენტის სი ძინპინის ინიციატივას „ერთი სარტყელი – ერთი გზა. საქართველომ მხარი დაუჭირა ამ ინიციატივას და უკვე 2015 წელს ჩინურ მხარესთან გაფორმდა თანამშრომლობის მემორანდუმი, რომელმაც ახალი ბიძგი მისცა ქართულ-ჩინური ეკონომიკური ურთიერთობების გაღრმავებას. ამჟამად საქართველოსა და ჩინეთს შორის გაფორმებულია შეთანხმება თავისუფალი ვაჭრობის შესახებ.