თბილისი, 19 ივნისი — Sputnik. ღრმაწყლოვანი ანაკლიის პორტისკენ მიმავალი 18-კილომეტრიანი საავტომობილო გზისა და რკინიგზის ხაზების დაპროექტება აქტიურ ფაზაშია, ნათქვამია საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის განცხადებაში.
ანაკლიის პორტის მშენებლობა: ხელისუფლებამ გზის მიმართულება აირჩია>>
ანაკლიის პირველი ღრმაწყლოვანი პორტის მშენებლობის ფარგლებში საავტომობილო გზის და სარკინიგზო ხაზის მშენებლობა საქართველოს ხელისუფლების ვალდებულებაა. გზების დაპროექტებას ახორციელებს ავსტრალიური კომპანია SMEC. დაპროექტების სამუშაოების ღირებულება 7 მილიონ ლარს შეადგენს. დაპროექტება დასრულდება მიმდინარე წლის ოქტომბერში, ხოლო მშენებლობა პორტის მუშაობის დაწყებამდე უნდა დასრულდეს.
„ამ დროისთვის ტოპო-გეოდეზიური სამუშაოები დასრულების ეტაპზეა და ინტენსიურად ხორციელდება გეოლოგიური სამუშაოები. ადგილზე ერთდროულად ოთხი საპროექტო ჯგუფი მუშაობს", – აღნიშნულია განცხადებაში.
დაპროექტების ფარგლებში მომზადდება დოკუმენტები გარემოზე ზემოქმედების შეფასებისა და მოქმედებების გეგმის განახლების კუთხით. უწყების მონაცემებით, უშუალოდ მშენებლობის დაწყება 2019 წლის დეკემბერშია დაგეგმილი.
ცნობილი საკონსულტაციო კომპანია SMEC 1949 წელს დაფუძნდა. ის ავსტრალიური კომპანია SJ Group-ის ნაწილია. კომპანია მუშაობს მსოფლიოს 40-ზე მეტ ქვეყანაში. SMEC-ს საქმიანობის სფეროა ხიდების, გზების, აეროპორტების, რკინიგზის, გვირაბების, ჰესებისა და მეტროს დაპროექტება.
საქართველოში პირველი ღრმაწყლოვანი პორტის მშენებლობა 2017 წლის დეკემბერში დაიწყო.
პროექტს ახორციელებს „ანაკლიის განვითარების კონსორციუმი", რომელიც ქართულმა კომპანია TBC Holding-მა და ამერიკულმა კომპანია Conti International LLC-მ დააფუძნეს. ამჟამად კონსორციუმში გაერთიანებული არიან ასევე პორტის ოპერატორი SSA Marine (აშშ), British Wondernet Express (ცენტრალური აზია) და G-Star Ltd (ბულგარეთი).
პორტმა პირველი ტვირთები 2021 წელს უნდა მიიღოს.