თბილისი, 18 მაისი — Sputnik. ევროკომისიის დირექტორატმა ჯანდაცვისა და მომხმარებელთა უფლებების დაცვის საკითხებში რეკომენდაცია გასცა, რომ საქართველო მიიღონ იმ ქვეყნების სიაში, საიდანაც ევროკავშირის ქვეყნებში თაფლის მიწოდება შეიძლება, აღნიშნულია სოფლის მეურნეობის სამინისტროს ვებგვერდზე განთავსებულ განცხადებაში.
„ცხოველური წარმოშობის ყველა პროდუქტს ევროკავშირი უყენებს მაღალ სანიტარულ მოთხოვნებს, რათა მაქსიმალურად დაცული იყოს მომხმარებელთა ჯანმრთელობა. აქამდე ქართული თაფლის ექსპორტი ევროკავშირის ბაზარზე არ იყო ნებადართული, თუმცა დღეს ჩვენ გვაქვს ძალიან დიდი წარმატება ამ კუთხით“, — განაცხადა ევროკავშირის ელჩმა საქართველოში იანოშ ჰერმანმა.
საქართველოს სოფლის მეურნეობის მინისტრმა ოთარ დანელიამ ჰერმანს აქტიური თანამშრომლობისა და მხარდაჭერისთვის მადლობა გადაუხადა.
სოფლის მეურნეობის სამინისტრომ, მეფუტკრეობის დარგის განვითარებისა და ქართული თაფლის ევროკავშირის ბაზარზე ექსპორტის სტიმულირების მიზნით რიგი ღონისძიებები გაატარა.
ევროკავშირის მოთხოვნით, საქართველოში მომზადდა საკანონმდებლო ცვლილებები, რომელიც ევროპულ კანონმდებლობასთან დაახლოებას ითვალისწინებს. კერძოდ, დამტკიცდა ვეტერინარული პრეპარატების, სხვა დამაბინძურებლებისა და ნარჩენი ნივთიერებების მონიტორინგის გეგმა.
