თბილისი, 12 აპრილი — Sputnik. აზიის განვითარების ბანკმა ტექნიკური დახმარების პროექტის ფარგლებში, საქართველოს 750 ათას დოლარიანი გრანტი გამოუყო სატრანსპორტო პოლიტიკისა და სამოქმედო გეგმის შემუშავების მიზნით, იტყობინება ეკონომიკისა და მდგრადი განვითარების სამინისტრო.
ქვეყნის სატრანზიტო და სატრანსპორტო პოტენციალის სრული რეალიზება, საქართველოს გეოპოლიტიკური მდებარეობიდან გამომდინარე, მთავრობის პრიორიტეტული მიმართულებაა. ეკონომიკისა და მდგრადი განვითარების სამინისტრო აქტიურად თანამშრომლობს აზიის განვითარების ბანკთან ამ მიმართულებით, განაცხადეს ეკონომიკის სამინისტროში.
დოკუმენტის პროექტზე, რომელშიც შენიშვნები და შესწორებები შევიდა, ერთობლივად მუშაობდნენ საერთაშორისო და ადგილობრივი ექსპერტები.
სატრანსპორტო პოლიტიკისა და სამოქმედო გეგმის დოკუმენტის განხორციელება ხელს შეუწყობს სატრანსპორტო სექტორის ეფექტური მუშაობის ამაღლებას, ქვეყნის ინტეგრაციას საერთაშორისო სატრანსპორტო სისტემებში და სატრანსპორტო სფეროში დამატებითი ინვესტიციების მოზიდვას, იტყობინება ეკონომიკის სამინისტრო.
