თბილისი, 30 ნოემბერი — Sputnik. 2015 წლის იანვარ-ოქტომბერში, 2014 წლის შესაბამის პერიოდთან შედარებით, საქართველოდან თურქეთში ექსპორტის მოცულობა 18%-ით (35 მლნ აშშ დოლარით) შემცირდა და 160,5 მლნ აშშ დოლარზე მეტი — საქართველოს ექსპორტის მთლიანი მოცულობის 8,8% შეადგინა, იუწყება „საქსტატი“.
კერძოდ, 2015 წლის იანვარ-ოქტომბერში საქართველოდან თურქეთში რკინის ნახევარფაბრიკატები ექსპორტირებულია 19 მლნ აშშ ღირებულების, რაც 6,2 მლნ აშშ დოლარით ნაკლებია 2014 წლის ანალოგიური პერიოდის მაჩვენებელზე. საანგარიშო პერიოდში ელექტროენერგიის ექსპორტი 2 მლნ აშშ დოლარით გაიზარდა და დაახლოებით 17 მლნ აშშ დოლარი შეადგინა, ხოლო ტრიკოტაჟის პროდუქციის ექსპორტი 3,8 მლნ აშშ დოლარით გაიზარდა და 34,4 მლნ აშშ დოლარზე მეტი შეადგინა.
საანგარიშო პერიოდში ასევე დაფიქსირდა თურქეთიდან საქართველოში იმპორტის მოცულობის შემცირება. 2015 წლის იანვარ–ოქტომბრის პერიოდში, 2014 წლის იანვარ-ოქტომბერთან შედარებით, თურქეთიდან საქართველოში იმპორტის მოცულობა 23%-ით შემცირდა (316,3 მლნ აშშ დოლარით) და დაახლოებით 1,1 მლრდ აშშ დოლარი – საქართველოს იმპორტის საერთო მოცულობის 17,3% შეადგინა.
2015 წლის იანვარ- სექტემბრის პერიოდში სამკურნალო საშუალებების იმპორტი 9 მლნ აშშ დოლარით გაიზარდა და 64 მლნ აშშ დოლარი შეადგინა, ხოლო სანიტარულ-ჰიგიენური პროდუქციის იმპორტი 3 მლნ აშშ დოლარით შემცირდა და 28 მლნ აშშ დოლარი შეადგინა.
იმპორტ%
საანგარიშო პერიოდში პლასტმასის მილების იმპორტმა 32,4 მლნ აშშ დოლარი შეადგინა, რაც გასული წლის იანვარ-ოქტომბერთან შედარებით, თითქმის 5 მლნ აშშ დოლარით მეტია, ხოლო შავი ლითონის კონსტრუქციების იმპორტი 3,4 მლნ აშშ დოლარით შემცირდა და 27,1 მლნ აშშ დოლარი შეადგინა.
2015 წლის იანვარ-ოქტომბრის პერიოდში საქართველოს მთავარი სავაჭრო პარტნიორი თურქეთია. მოცემულ პერიოდში საქართველოს საგარეო სავაჭრო ბრუნვამ თურქეთთან 1,2 მლრდ აშშ დოლარზე მეტი შეადგინა, რაც 2014 წლის იანვარ-ოქტომბრის პერიოდთან შედარებით 22%-ით ნაკლებია. თურქეთთან ბრუნვამ საქართველოს მთლიანი საგარეო სავაჭრო ბრუნვის 15,3% შეადგინა.