თბილისი, 17 სექტემბერი — Sputnik. ბაკურიანში დიდველზე მრავალფუნქციური გამაჯანსაღებელი კომპლექსი აშენდება, რომელშიც გაერთიანდება აკვა-პარკი, ველნესცენტრი და ფიტნესცენტრი, იტყობინება ეკონომიკისა და მდგრადი განვითარების სამინისტრო. უწყების ინფორმაციით, შეთანხმება შედგა ინვესტორთან და გაკეთდება აღნიშნული მიწის ნაკვეთის განერალური განაშენიანების გეგმა, რომელიც შემდეგში საინვესტიციო ხელშეკრულებას დაერთვება.
„აკვა-პარკის მშენებლობის შესახებ შეთანხმება უკვე შედგა და ის ბაკურიანს მთელი წლის განმავლობაში მოემსახურება. აკვა-პარკი პირველ ეტაპზე ერთდროულად მიიღებს 500-600 ადამიანს, თუმცა, როგორც ინვესტორმა აღნიშნა, ბაკურიანის ბუნება და ლანდშაფტი უნიკალურია სპორტსმენებისთვის და არამარტო აკვა-პარკის, არამედ სხვა ინფრასტრუქტურის მშენებლობის საშუალებასაც იძლევა — გასართობ-დასასვენებელი, სავაჭრო და საბავშვო ცენტრების, ასევე სასტუმრო კომპლექსის, საკონფერენციო დარბაზების, ფიტნესის სპეცდარბაზების და ა.შ“, —ნათქვამია ინფორმაციაში.
ინვესტიცია რამდენიმე მილიონ დოლარს მოიცავს და ის ეტაპობრივად განხორციელდება. პირველი ეტაპი აკვა-პარკის მშენებლობას ითვალისწინებს. მისი სამშენებლო სამუშაოები უკვე გაზაფხულზე დაიწყება, მომავალი ზამთრის სეზონზე კი ვიზიტორებს უკვე შეეძლებათ აკვა-პარკით სარგებლობა.
