თბილისი, 16 სექტემბერი — Sputnik. ქვეყნის ერთ-ერთი ყველაზე დიდი ჰიდროელექტროსადგურის ნენსკრა ჰესის მშენებლობის დაწყების საზეიმო ცერემონია შედგა ოთხშაბათს, 16 სექტემბერს სვანეთში, მდინარე ენგურის ერთ-ერთ შენაკადზე.
ცერემონიაში მონაწილეობა საქართველოს პრემიერ-მინისტრმა ირაკლი ღარიბაშვილმა მიიღო, იტყობინება საქართველოს ენერგეტიკის სამინისტრო.
280 მგვტ დადგმული სიმძლავრის ნენსკრას ჰიდროელექტროსადგურის პროექტს საპარტნიორო ფონდი კორეულ კომპანია K-Water-თან ერთად სვანეთში მდ. ენგურის შენაკადზე განახორციელებს. ნენკსრას პოტენციური წლიური გამომუშავება 1.2 მლრდ კვტ/სთ. იქნება. სადგური ელექტროენერგიის გამომუშავებას 2019 წლიდან დაიწყებს, ხოლო პროექტი საბოლოოდ 2021 წელს დასრულდება. პროექტის ჯამური საინვესტიციო ღირებულება 1 მლრდ აშშ დოლარია. საბანკო სესხის კომპონენტში მონაწილეობს ევროპის რეკონსტრუქციისა და განვითარების ბანკი (EBRD), აზიის განვითარების ბანკი (ADB) და კორეის „ექსიმ ბანკი.“
ფონდის მრჩეველი ამ პროექტში საერთაშორისო საფინანსო კორპორაციაა —IFC.
