სააკაშვილმა აგრონომებს სოფლის მეურნეობის ელიტარული ოფიცრები უწოდა

გამოწერა
ორშაბათს საქართველოს პრეზიდენტმა კახეთში ქართველ აგრონომებთან გამართა შეხვედრა და განაცხადა, რომ ქვეყანაში აგრონომების გადამზადების პროგრამა იწყება და პირველი ნაკადი უკვე მიემგზავრება ეგვიპტეში.

თბილისი, 18 ოქტომბერი - ”ახალი ამბები - საქართველო”, ანა თუთბერიძე. ორშაბათს საქართველოს პრეზიდენტმა კახეთში ქართველ აგრონომებთან გამართა შეხვედრა, სადაც აშშ-იდან შემოტანილი ხორბლის საშენოდგომო თესვა მიმდინარეობს, და განაცხადა, რომ ქვეყანაში აგრონომების გადამზადების პროგრამა იწყება და პირველი ნაკადი უკვე მიემგზავრება ეგვიპტეში.

”ქართველი სპეციალისტების გადამზადების არც ერთ პროგრამას ისე არ გავუხარებივარ, როგორც აგრონომების და სოფლის მეურნეობის სექტორის წარმომადგენლების გადამზადებას”, - განაცხადა სახელმწიფოს მეთაურმა.

აგრონომებისადმი მიმართვისას სააკაშვილმა აღნიშნა, რომ ისინი იქნებიან ”მაღალი განთლების მქონე ახალი ელიტა, რომლებიც ქართულ სოფლის მეურნეობას ააღორძინებენ”.

”შეგიძლიათ ჩათვალოთ, რომ საქართველოს სოფლის მეურნეობაში თქვენ ახალი ოფიცერთა კორპუსი ხართ, რომელიც ახალ მეთოდოლოგიას გამოიყენებს და ქვეყანას ამ მიმართულების გააქტიურების საშუალებას მისცემს”, - განაცხადა სააკაშვილმა და აღნიშნა, რომ სურსათის პრობლემა მთელს მსოფლიოში არსებობს.

პრეზიდენტის თქმით, სპეციალისტების გადამზადებისთვის ეგვიპტე იმიტომ შეარჩიეს, რომ ამ ქვეყანას ძალიან განვითარებული სოფლის მეურნეობის ცალკეული დარგები აქვს. ამასთან, სააკაშვილმა აღნიშნა, რომ სპეციალისტების გადამზადება ასევე მოხდება დასავლეთ ევროპასა და აშშ-ში. 

ყველა ახალი ამბავი
0