თბილისი, 30 ივლისი — Sputnik. „საქართველოს რკინიგზამ" ცნობილი ბრიტანელი შემსრულებლის ჯესი ჯეის (Jessie J) კონცერტის გამო, რომელიც 6 აგვისტოს Black Sea Arena-ს სცენაზე გაიმართება, დამატებითი რეისები დანიშნა.
კონცერტზე დასწრების მსურველებისთვის მატარებელი Black Sea Arena-ს ახლოს სადგურზეც გაჩერდება.
თბილისიდან მატარებელი 6 აგვისტოს 12:40 საათზე გავა და საკონცერტო დარბაზის სადგურზე 17:25 საათზე იქნება, ხოლო ბათუმში – 18:23 საათზე.
„საქართველოს რკინიგზამ" კონცერტის სტუმრების უკან დაბრუნებაზეც იზრუნა. მატარებელი ბათუმიდან 23:50 საათზე გამოვა, საკონცერტო დარბაზის სადგურზე იქნება 0:38 საათზე, ხოლო თბილისში 5:15 საათზე ჩამოვა.
ჯესი ჯეის კონცერტი სამთავრობო პროგრამის Check in Georgia ფარგლებში იმართება, რომელიც მიმართულია საქართველოს საერთაშორისო არენაზე პოპულარიზებისკენ.
ჯესი ჯეის ნამდვილი სახელი და გვარია ჯესიკა ელენ კორნიში. ის ბავშვობიდან იყო გატაცებული ცეკვით, სამსახიობო ხელოვნებითა და მუსიკით. უკვე თხუთმეტი წლისამ მოიპოვა საუკეთესო პოპ-შემსრულებლის წოდება სატელევიზიო კონკურსში მოზარდებისთვის Britain's Brilliant Prodigies.
