თბილისი, 17 ივლისი — Sputnik. საქართველოს, ყაზახეთისა და ევროპის ქვეყნების დიზაინერები აჭარის მოდის კვირეულში (Adjara Fashion Week, AFW) მიიღებენ მონაწილეობას, რომელიც ბათუმში 26-28 ივლისის პერიოდში გაიმართება.
ყოველ ზაფხულს აჭარის დედაქალაქი მოდის მიმდევრებს როგორც ადგილობრივი ქართველი, ისე უცხოელი დიზაინერებისა და ბრენდების ახალ კოლექციებს სთავაზობს.
წელს Adjara Fashion Week-ის დეფილე სამ ლოკაციაზე გაიმართება: Grand Hotel Batumi Black Sea, Palm Apartments-ი და ბათუმის ი. ჭავჭავაძის სახელობის სახელმწიფო დრამატული თეატრი.
მოდის კვირეულის სტუმრები ქართველი დიზაინერებიდან იხილავენ მანანა Goglichidze-ის, Nana Stepliani-ის, Natia Partenadze-ის, Teona Tavdgiridze-ის, Ia Goniadze-ის, Luka-ს, Tatana-ს, Khatuna Jobakhidze-ის, Salome de Mod-ის (Salome Amanatashvili), N.T. Style-ისა (Natia Tkhelidze) და სხვების ბოლო კოლექციებს.
მოდის კვირეულზე საკუთარ შემოქმედებას წარმოადგენენ ასევე თბილისის ა. ქუთათელაძის სახელობის სახელმწიფო სამხატვრო აკადემიისა და ბათუმის ხელოვნების სახელმწიფო უნივერსიტეტის სტუდენტები.
AFW -ზე უცხოელ მონაწილეებს შორის იქნებიან ყაზახი დიზაინერები ლეონიდ ჟერებცოვი, თამარა ლამანუკაევა და ალიონა პოლიანსკაია, ფრანგი დიზაინერი Maidou (Henri Philippe) და სხვები.
Adjara Fashion Week 2019-ის სტუმრები ასევე იქნებიან ბუტიკი Vanity-ის დამფუძნებელი, 2007 წლიდან მილანში მცხოვრები მილა ანუფრიევა (Mila Anufrieva) და ფრანგი ბაიერი Sandy Mitteau.
გარდა ამისა, ბათუმში მოდის კვირეულს დაესწრებიან უცხოური პრესის წარმომადგენლები: Cosmopolitan Ukraine (ანასტასია ბლაგოდარნაია), Where Minsk (ინა ვასილენკო), Tengri News (დინარა მურატოვა), Forbes (ტატიანა პანჩენკო, ირინა სევოსტიანოვა).
ჩვენებების დაწვრილებითი პროგრამის გაცნობა შესაძლებელია ღონისძიების ოფიციალურ Facebook-გვერდზე.
ბათუმში მოდის კვირეული პირველად 2015 წელს ჩატარდა. პროექტ Adjara Fashion Week-ის მიზანია, ხელი შეუწყოს კულტურული ტურიზმის განვითარებას აჭარაში, გააცნოს საზოგადოებას ახალგაზრდა დიზაინერები და დააკავშიროს ერთმანეთთან მოდისა და ბიზნესის წარმომადგენლები.
