თბილისი, 11 დეკემბერი — Sputnik. ცნობილი რუსი კომპოზიტორის სერგეი რახმანინოვის 145 წლის იუბილისადმი მიძღვნილი კლასიკური მუსიკის საღამო თბილისის ვ. სარაჯიშვილის სახელობის სახელწიფო კონსერვატორიაში 12 დეკემბერს გაიმართება, იუწყებიან ორგანიზატორები.
ღონისძიების ინიციატორები არიან ნიჭიერი ქართველი პიანისტი სანდრო გეგეჭკორი და კონსერვატორიის პროფესორი, კონცერტმაისტერი ნანი სანაძე.
სცენაზე გაჟღერდება რახმანინოვის რომანსები, სიუიტა №2 ორი ფორტეპიანოსთვის, „სკერცო" ფორტეპიანოსთვის ოთხ ხელში, სონატა ფორტეპიანოსა და ვიოლონჩელოსთვის, „ბარკაროლა" და კომპოზიტორის სხვა ნაწარმოებები.
კონცერტზე მსმენელის წინაშე წარდგებიან კონსერვატორიის სტუდენტები და ზ. ფალიაშვილის სახელობის თბილისის ცენტრალური მუსიკალური სკოლის "ნიჭიერთა ათწლედის" მოსწავლეები.
როგორც ორგანიზატორები აცხადებენ, მსმენელს მრავალი სასიამოვნო სიურპრიზი ელოდება, მათ შორის რახმანინოვის სახლ-მუზეუმის დირექტორის ალექსანდრე ერმაკოვის სამადლობელი წერილი თბილისის სახელმწიფო კონსერვატორიის და პროფესორ ნანი სანაძის მიმართ.
საღამო 20:00 საათზე დაიწყება, დასწრება თავისუფალია.