თბილისი, 9 დეკემბერი — Sputnik. შალვა ამირანაშვილის სახელობის ხელოვნების მუზეუმში 14 დეკემბერს გიგო გაბაშვილის საიუბილეო-რეტროსპექტული გამოფენა გაიხსნება, ნათქვამია საქართველოს ეროვნული მუზეუმის ვებგვერდზე გავრცელებულ განცხადებაში.
გამოფენაზე წარმოდგენილი იქნება მხატვრის ფერწერული და გრაფიკული ნამუშევრები, მისი ფოტონამუშევრების ელექტრონული ვერსიები და ხელნაწერები.
ექსპოზიციაზე დამთვალიერებელს საშუალება ექნება იხილოს მხატვრის სამუშაო ოთახის რეკონსტრუქცია, მისი ავეჯი და პირადი ნივთები. ექსპონატთა ნაწილი პირველად იქნება გამოფენილი ფართო საზოგადოების წინაშე.
გამოფენა 14 დეკემბერს გაიხსნება და სამ თვეს გაგრძელდება.
ქართულ ფერწერაში რეალისტური მიმართულების ფუძემდებლი გიგო გაბაშვილი 1862 წელს დაიბადა. მისი შემოქმედებითი მემკვიდრეობა ორი ათასზე მეტ ტილოს ითვლის. გიგო გაბაშვილი მუშაობდა ზეთის საღებავებით, აკვარელით, აქვს კალმით ნახატებიც. ხელოვნების უსაზღვრო სიყვარულისა და იშვიათი შრომისმოყვარეობის მეოხებით მხატვარი შეუპოვრად სძლევდა ყოველგვარ დაბრკოლებას, სიძნელეს და ღირსეულად ასრულებდა თავის პატრიოტულ, მოქალაქეობრივ მოვალეობას სამშობლოს წინაშე. მან ერთ-ერთმა პირველმა დაამკვიდრა საბოლოოდ ევროპული მხატვრობის ფორმები ჩვენში, იდეურ-თემატიკურად გააფართოვა და რეალურ ცხოვრებას დაუკავშირა ქართული მხატვრობა.
მხატვრის მდიდარი შემოქმედებითი მემკვიდრეობის უმეტესი ნაწილი, მისი ანდერძის თანახმად, ხელოვნების მუზეუმს გადაეცა. გარკვეული ნაწილი კი საქართველოსა და უცხოეთის კერძო კოლექციებშია დაცული.
