თბილისი, 15 აპრილი-Sputnik. მიხეილ თუმანიშვილის სახელობის ხელოვნების ქართულ საერთაშორისო ფესტივალს GIFT („საჩუქარი“), მიენიჭა ევროპული ხარისხის ნიშანი EFFE Label 2017-18.
EFFE-გახლავთ საერთაშორისო პლატფორმა, იგი ევროპის ფესტივალების ასოციაციამ, იმ ინოვაციური ფესტივალების გაერთიანებისთვის შექმნა, რომლებიც ემსახურებიან ხელოვნებას, მიმართული არიან ადგილობრივი საზოგადოების ცხოვრების განვითარებისკენ და ევროპულ ღირებულებებს იზიარებენ.
ამ ხარისხის ნიშნის მოსაპოვებლად, ევროპის ასეულობით ფესტივალმა წარადგინა განაცხადი. თვითეულ განაცხადს აფასებდნენ როგორც ადგილობრივი ექსპერტები, ისე ევროპის ფესტივალების კავშირის მიერ შექმნილი საერთაშორისო ჟიური.
EFFE ხარისხის ნიშნის მისაღებად ფესტივალი უნდა აკმაყოფილებდეს სამ კრიტერიუმს: შემოქმედებითი მიდგომა, მასში ადგილობრივი საზოგადოების ჩართულობა და ფესტივალის საერთაშორისო მიმართულება.
„ჯილდოს ადასტურებს საერთაშორისო ჟიური. ასეთი საინტერესო და მრავალმხრივი პროგრამით, ფესტივალს განვითარების დიდი პოტენციალი გააჩნია“- ნათქვამია GIFT-ის ვებ გვერდზე სოციალურ ქსელ FACEBOOK-ში.
ამიერიდან, ხელოვნების ქართული საერთაშორისო ფესტივალი EFFE-ს წევრია, რომელსაც ფესტივალების ევროპული ასოციაცია ხელმძღვანელობს. ამ სისტემაში გაერთიანებული ფესტივალები ხელოვნების მაღალ დონეს ინარჩუნებენ და დიდ გავლენას ახდენენ ადგილობრივ, ეროვნულ და საერთაშორისო არენაზე, ნათქვამია განცხადებაში.
GIFT-ი ფესტივალების ევროპული ასოციაციის ერთადერთი წევრია საქართველოდან. იგი დაარსდა 1997 წელს ხელოვნების საერთაშორისო ფესტივალების მიერ (ედინბურგი, ადელაიდა, მელბურნი და პერტი). დამაარსებელი და სამხატვრო ხელმძღვანელია ქართველი რეჟისორი ქეთი დოლიძე.
ყოველწლიურად GIFT-ი წარმოადგენს საქართველოსა და მსოფლიოს საუკეთესო თეატრალური დასების შემოქმედებას. მათ შორის არიან მოსკოვის ვახტანგოვის თეატრი, დმიტრი კრიმოვის ლაბორატორია, ბერლინის ფოლკსბიუნეს თეტრი და ბევრი სხვა კოლექტივი. ფესტივალის ფარგლებში იმართება სხვადასხვა გამოფენები, პერფორმანსები, საცეკვაო სანახაობები მასტერ-კლასები.
Sputnik საქართველო 2016 წელს ფესტივალის საერთაშორისო საინფორმაციო პარტნიორი იყო.
