თბილისი, 7 აგვისტო — Sputnik. სომხეთის საგარეო საქმეთა სამინისტრო არკვევს საქართველოში მომხდარი ავტოავარიის დეტალებს, რომლის შედეგად ქალი და ბავშვი დაიღუპნენ, იუწყება "Sputnik-სომხეთი" ქვეყნის საგარეო უწყების პრეს-მდივნის ტიგრან ბალაიანის ინფორმაციაზე დაყრდნობით.
"სომხეთის საელჩო საქართველოში ამ საქმით არის დაკავებული. სომხეთის საგარეო საქმეთა სამინისტრო მუდმივად უკავშირდება საელჩოს, დეტალები ჯერ არ არის. ველოდებით მომხდარის ვითარებაში გარკვევას", — განაცხადა ბალაიანმა.
საქართველოს შსს-ს პრეს-სამსახურის ინფორმაციით, სამართალდამცველებმა დააკავეს სომხეთის მოქალაქე გ.ჩ., რომელიც 5 აგვისტოს სურამში, თბილისი-სენაკი-ლესელიძის საავტომობილო გზის 136-ე კილომეტრზე ავტომობილ "ნისან ტილდათი" მოძრაობისას ქვეითად მოსიარულე დედა-შვილს დაეჯახა, რომლებიც ტროტუარზე მიდიოდნენ. ქალი 38 წლის, ხოლო ბავშვი — 5 წლის იყო. ორივე ადგილზე გარდაიცვალა.
გამოძიება ტრანსპორტის მოძრაობის უსაფრთხოების ან ექსპლუატაციის წესის დარღვევის ფაქტზე მიმდინარეობს, რამაც ორი ან მეტი ადამიანის სიცოცხლის მოსპობა გამოიწვია. თუ მძღოლის ბრალი დამტკიცდება, მას 6-დან 10 წლამდე ვადით თავისუფლების აღკვეთა ემუქრება.
