თბილისი, 5 ოქტომბერი - ”ახალი ამბები - საქართველო”. სამშაბათს გაიმართება სენატის სხდომა, რომელზეც აზერბაიჯანში აშშ-ის ელჩად მეტიუ ბრაიზას დანიშვნის საკითხს განიხილავენ, იუწყება სენატის ოფიციალური ვებ-გვერდი.
აზერბაიჯანში ელჩის თანამდებობაზე კანდიდატურის განხილვასთან ერთად სხდომაზე ასევე განიხილავენ ელჩების დანიშვნას სხვა ქვეყნებში, მათ შორის - თურქეთში.
აზერბაიჯანში აშშ-ის ელჩის თანამდებობა 2009 წლის ივლისიდან ვაკანტურია. ეს თანამდებობა ბოლოს ენ დერსის ეკავა. მან ეს თანამდებობა თავისი უფლებამოსილების ვადის ამოწურვის გამო დატოვა.
პირველი მოსმენების შემდეგ კომიტეტმა მეტიუ ბრაიზას კანდიდატურასთან დაკავშირებით კენჭისყრა სექტემბრისთვის გადადო.
21 სექტემბერს აშშ-ის სენატის საგარეო ურთიერთობების კომიტეტის სხდომაზე ბრაიზა აზერბაიჯანში ელჩის თანამდებობაზე დაამტკიცეს. მას მხარი დაუჭირა 17-მა სენატორმა, წინააღმდეგ წავიდა - ორი. ახლა ბრაიზას დანიშვნა სენატმა უნდა დაამტკიცოს.
მანამდე ბრაიზას მიმართ აშშ-ის სომხური ლობის წარმომადგენლების მრიდან სხვადასხვა ბრალდებები ისმოდა. ისინი ბრაიზას არაკომპეტენტურობას და არაობიექტურობაში ადანაშაულებდნენ, ასევე აქცენტს აკეთებდნენ ბრაიზას მეუღლის - ზეინო ბარანის ეროვნებაზე, რომელიც თურქია. შედეგად, მისი დანიშვნა აშშ-ის ელჩის თანამდებობაზე აზერბაიჯანში კითხვის ნიშნის ქვეშ მოექცა.
აშშ-ის აზერბაიჯანულმა სათვისტომომ სენატში მოსმენების დაწყებამდე სენატორებს მეტიუ ბრაიზას კანდიდატურის მხარდაჭერის თხოვნით მიმართა.
2010 წლის ქ ივლისიდან აზერბაიჯანში აშშ-ის საქმეებში დროებით რწმუნებულად ადამ სტირლინგი დაინიშნა.
ბრაიზა წლების განმავლობაში სახელმწიფო დეპარტამენტში მუშაობდა. იგი იყო ქართულ-აფხაზური და ქართულ-ოსური კონფლიქტების მოგვარების კოორდინატორი, ასევე მთიანი ყარაბაღის კონფლიქტის მოგვარების საკითხებში კოორდინატორი. 1995-1997 წლებში ბრაიზა მოსკოვში ამერიკის საელჩოში მუშაობდა.
ბრაიზა 22 წელია, დიპლომატიურ სამსახურშია. ევროპის და ევრაზიის საკითხებში სახელმწიფო მდივნის მეორე მოადგილის თანამდებობაზე დანიშვნამდე ის აშშ-ის ეროვნული უსაფრთხოების საბჭოში ევროპის და ევრაზიის საკითხებში განყოფილების დირექტორი იყო, ასევე - პრეზიდენტის და სახელმწიფო მდივნის სპეციალური მრჩეველი კასპიის რეგიონის ენერგეტიკული დიპლომატიის საკითხებში. ბრაიზა რუსეთსა და პოლონეთში სახელმწიფო დეპარტამენტის ხაზით მუშაობდა, სწავლობდა სტენფორდის უნივერსიტეტში.