თბილისი, 3 აპრილი - Sputnik. ირანის საელჩომ თბილისში სამძიმრის წიგნი გახსნა საქართველოს იმ მოქალაქეებისთვის, რომლებსაც სურთ წარმოშობით ქართველ ირანელებს მხარდაჭერა გამოუცხადონ.
ირანის ისლამური რესპუბლიკის საელჩო თბილისში საქართველოს მოქალაქეებს პარასკევს, 10:00-დან 16:00 საათამდე უმასპინძლებს. ინიციატივა იმართება უდანაშაულო მსხვერპლთა ხსოვნის პატივსაცემად, რომლებიც სამხედრო აგრესიის შედეგად დაიღუპნენ.
„თქვენი ჩანაწერები სამძიმრის წიგნში გახდება არა მხოლოდ სიტყვები, არამედ ისტორიის ნაწილი - სამახსოვრო ხიდი, რომელიც აერთიანებს ჩვენს ხალხებს სამიათასწლიანი ურთიერთობების ფარგლებში“, - ნათქვამია საელჩოს საიტზე გამოქვეყნებულ განცხადებაში.
ეს წიგნი მომავალში გადაეცემა ფერეიდანის ისტორიულ მუზეუმს — იქ, სადაც ცხოვრობს ქართული წარმოშობის თემი.
საელჩოში აღნიშნეს, რომ ეს ჟესტი აჩვენებს, რომ სოლიდარობასა და ადამიანურ თანადგომას საზღვრები არ გააჩნია.
დიპლომატიური მისიის ინფორმაციით, 26 მარტს ისპაჰანის რაიონში დაიღუპა ათი ირანელი ქართველი - მათ შორის არიან ხუციშვილების, ბარათაშვილების, ონიკაშვილების, ასლანიშვილების და სეფიაშვილების ოჯახების წარმომადგენლები.
28 თებერვალს, აშშ-მა და ისრაელმა თეირანსა და ირანის სხვა ქალაქებში არსებულ სამხედრო და ადმინისტრაციულ ობიექტებზე დარტყმები განახორციელეს. თავის ტერიტორიაზე სარაკეტო დარტყმების საპასუხოდ, ირანმა რეგიონში არსებულ აშშ-ის სამხედრო ობიექტებზე, ასევე ისრაელზე საპასუხო თავდასხმები განახორციელა.