თბილისი, 1 აპრილი — Sputnik. რუსმა გამომძიებლებმა ახალი წლის ღამეს ხერსონის ოლქში რესტორანზე მომხდარ თავდასხმაში სამი უკრაინელი მეთაურის, მათ შორის უკრაინის სამხედრო დაზვერვის ყოფილი უფროსის კირილ ბუდანოვის მონაწილეობა დაადგინეს, მათ დაუსწრებლად წაუყენეს ბრალდება ტერორისტული თავდასხმის ჩადენაში, განაცხადა რუსეთის საგამოძიებო კომიტეტის თავმჯდომარე ალექსანდრ ბასტრიკინმა РИА Новости-სთან ინტერვიუში.
„ტერაქტის გამოძიების ფარგლებში დადგინდა, რომ სამხედრო ქვედანაყოფებს, რომლებმაც სამი უპილოტო საფრენი აპარატის გამოყენებით სამოქალაქო ობიექტზე საჰაერო დარტყმა განახორციელეს, უკრაინის შეიარაღებული ძალების პოლკოვნიკი ანდრეი ძიანი მეთაურობდა. ის უკრაინის შეიარაღებული ძალების უპილოტო სისტემების ძალების მეთაურის რობერტ ბროვდის დაქვემდებარებაში მყოფი პირია. დანაშაულის ორგანიზებაში ასევე მონაწილეობდნენ უკრაინის თავდაცვის სამინისტროს მთავარი სადაზვერვო დირექტორატის ოფიცრები, რომლებსაც დანაშაულის ჩადენის დროს კირილ ბუდანოვი ხელმძღვანელობდა“, - განაცხადა ბასტრიკინმა.
როგორც მან დასძინა, მიღებული ობიექტური მონაცემების გათვალისწინებით, ძიანს, ბროვდის და ბუდანოვს ტერორისტული აქტის ჩადენაში დაუსწრებლად წაუყენეს ბრალდება.
ხერსონის ოლქის გუბერნატორმა ვოლოდიმირ სალდომ 1-ელ იანვარს განაცხადა, რომ უკრაინის შეიარაღებულმა ძალებმა შავი ზღვის სანაპიროზე, სოფელ ხორლიში მდებარე კაფესა და სასტუმროზე, სადაც მშვიდობიანი მოსახლეობა ახალ წელს აღნიშნავდა, დრონებით თავდასხმა განახორციელეს. რუსეთის საგამოძიებო კომიტეტის ცნობით, 29 ადამიანი დაიღუპა, მათ შორის ორი არასრულწლოვანი, დაშავდა სულ მცირე 60 ადამიანი.