თბილისი, 11 მარტი - Sputnik. სახელმწიფო ინსტიტუტების წინააღმდეგ ძალადობის გამოყენება მიუღებელია და პოლიტიკური ცვლილებები მხოლოდ არჩევნების გზით უნდა მოხდეს, განაცხადა ეუთოს საპარლამენტო ასამბლეის სპეციალურმა წარმომადგენელმა სამხრეთ კავკასიაში ლუის გრასამ ასამბლეის დელეგაციის საქართველოში ვიზიტის შემდეგ.
ეუთოს საპარლამენტო ასამბლეის პრეზიდენტის, პერე ხუან პონს სამპიეტროს ხელმძღვანელობით დელეგაციის ვიზიტი საქართველოში გუშინ დასრულდა. როგორც ასამბლეის ვებგვერდზე გამოქვეყნებულ განცხადებაშია აღნიშნული, ვიზიტის მიზანი იყო დიალოგის ხელშეწყობა, დემოკრატიული ინსტიტუტების გაძლიერება და პოლიტიკურ ძალებს შორის ურთიერთქმედების წახალისება. ვიზიტის ფარგლებში დელეგაცია შეხვდა მთავრობის, ოპოზიციის, სამოქალაქო საზოგადოებისა და დიპლომატიური კორპუსის წარმომადგენლებს.
შეხვედრების შემდეგ, ეუთოს წარმომადგენლებმა აღნიშნეს, რომ ღრმა პოლიტიკური პოლარიზაცია ქვეყნის განვითარების ერთ-ერთ მთავარ დაბრკოლებად რჩება. მათ ასევე ხაზგასმით აღნიშნეს, რომ პოლიტიკურმა ძალებმა დიალოგში უნდა აწარმოონ და უთანხმოებები დემოკრატიული ინსტიტუტების მეშვეობით მოაგვარონ.
„კიდევ ერთხელ განვმარტოთ, როგორც ოქტომბერში: სახელმწიფო ინსტიტუტების წინააღმდეგ ძალადობის გამოყენება მიუღებელია. ცვლილებები უნდა მოხდეს საარჩევნო ყუთების და პოლიტიკის შემმუშავებელი ორგანოების მეშვეობით და არა მათი დამხობისკენ მიმართული ძალადობით“, - განაცხადა გრასამ.
როგორც ასამბლეის პრეზიდენტმა აღნიშნა, დელეგაციამ ქვეყანაში მრავალი აქტიური პოლიტიკოსი იხილა, რომლებიც აქტიურად ურთიერთობენ საერთაშორისო პარტნიორებთან, თუმცა ერთმანეთთან პრაქტიკულად ურთიერთობა არ გააჩნია.
„სამწუხაროდ, შოკირებული ვიყავი, როდესაც აღმოვაჩინე, რომ ისინი ერთმანეთთან არ ურთიერთობენ. მოვუწოდებ ყველა მხარეს კონსტრუქციული ჩართულობისკენ და დიალოგის აღდგენისკენ მიმართული პირდაპირი კომუნიკაციის დასაწყებად. ამაში განსაკუთრებული პასუხისმგებლობა მთავრობას ეკისრება“, - განაცხადა ეუთო-ს საპარლამენტო ასამბლეის პრეზიდენტმა.
დელეგაცია მიესალმა ფართო კონსენსუსს საქართველოს ევროპული ინტეგრაციისკენ მისწრაფებასა და იმასთან დაკავშირებით, რომ შემდეგი არჩევნები, რა დროსაც არ უნდა ჩატარდეს, უნდა შეესაბამებოდეს ეუთოს ფარგლებში არსებულ ვალდებულებებს.
თუმცა, აღინიშნა, რომ პოლიტიკურ ასპარეზზე ძლიერი პოლარიზაცია კვლავ დაბრკოლებად რჩება ამ მიზნების მისაღწევად. დელეგაციამ ხაზგასმით აღნიშნა, რომ ამომრჩეველი მომავალში მხარს დაუჭერს მათ, ვინც ამ მიზნების მისაღწევად კონსტრუქციულად იმოქმედებს.
„ჩვენი, ეუთო-ში ან სხვა რომელიმე საერთაშორისო ორგანოში, პრობლემების მოგვარება არ არის საჭირო. ეს ქართველი ხალხისა და ლიდერების გადასაწყვეტია და იმედი მაქვს, რომ პოლიტიკური სცენის დეესკალაციისა და რეალური პოლიტიკური დიალოგის დასაბრუნებლად პასუხისმგებლიან ნაბიჯებს ვიხილავ“, - განაცხადა ადამიანის უფლებათა და ჰუმანიტარულ საკითხთა კომიტეტის თავმჯდომარის მოადგილე კრისტინ ბლოუერმა.
დელეგაციამ ასევე სინანული გამოთქვა მმართველი პარტიის წარმომადგენლების მცდელობის გამო, აკრძალონ ზოგიერთი ოპოზიციური პარტია და ხაზი გაუსვა, რომ ეს, სავარაუდოდ, გაამწვავებს განხეთქილებას და კიდევ უფრო მეტ იზოლაციას გამოიწვევს.
ვიზიტი გაიმართა ეუთოს საპარლამენტო ასამბლეის საქართველოსთან მიმდინარე თანამშრომლობის ფარგლებში, მათ შორის ეს მოიცავს არჩევნების დაკვირვებას და საპარლამენტო თანამშრომლობას. ვიზიტის შედეგების განხილვა დაგეგმილია ჰააგაში ბიუროს მომავალ სხდომაზე და ასამბლეის ყოველწლიურ სესიაზე.
პრეზიდენტის რეზიდენციის ხელში ჩაგდების მცდელობა
4 ოქტომბერს თბილისში ადგილობრივი თვითმმართველობის არჩევნები საპროტესტო აქციების ფონზე ჩატარდა. შაბათს, საღამოს, საპროტესტო აქციის მონაწილეებმა ათონელის ქუჩაზე პრეზიდენტის სასახლის შენობის შტურმით აღება სცადეს და ამ ფორმით "ხელისუფლების ხალხისთვის გადაცემა" დაიწყეს.
სამართალდამცავებმა დემონსტრანტების წინააღმდეგ სპეციალური საშუალებები და წყლის ჭავლი გამოიყენეს. დაპირისპირების შედეგად 25 პოლიციელი დაშავდა, მათგან 15-ს ჰოსპიტალიზაცია დასჭირდა.
შსს-ს ცნობით, პოლიციამ დააკავა 60-ზე მეტი პირი, მათ შორის აქციის ხუთი ორგანიზატორი - პაატა ბურჭულაძე, მურთაზ ზოდელავა, ირაკლი ნადირაძე, ლაშა ბერიძე და პაატა მანჯგალაძე.
გამოძიება სსკ-ის 317-ე, 222-ე, 225-ე და 187-ე მუხლებით - სატრანსპორტო კომუნიკაციების ბლოკირების, მასობრივი არეულობის ორგანიზების, სხვისი საკუთრების დაზიანებისა და საქართველოს კონსტიტუციური წყობილების ძალადობრივი გზით შეცვლისკენ მოწოდების მუხლებით მიმდინარეობს.