თბილისი, 23 თებერვალი – Sputnik. ევროპელებს, მათი ამჟამინდელი განწყობის გათვალისწინებით, არ შეუძლიათ წვლილი შეიტანონ უკრაინის მოლაპარაკებების პროცესში და მოსკოვი მათ მონაწილეობაში აზრს ვერ ხედავს, განაცხადა რუსეთის პრეზიდენტის პრეს-მდივანმა დმიტრი პესკოვმა.
ასეთი იყო პესკოვის პასუხი გადაცემაში „Москва. Кремль. Путин" დასმულ კითხვაზე, მოსალოდნელი იყო თუ არა ევროპელების მონაწილეობა უკრაინის საკითხზე მოლაპარაკებებში.
„ევროპის ჩართულობაში აზრს ვერ ვხედავთ, დღევანდელი განწყობის გათვალისწინებით, მათ არანაირად არ შეუძლიათ დახმარება. თქვენ ახლახან ახსენეთ ევროპული დიპლომატიის ხელმძღვანელი (კაია კალასი - Sputnik) თავისი ბრწყინვალე განცხადებებით. ასეთი პოზიციით როგორ შეძლებენ ისინი დახმარებას?", - განაცხადა პესკოვმა.
სამმხრივი ფორმატი
სამშვიდობო მოლაპარაკებების მესამე რაუნდი ჟენევაში 17-18 თებერვალს გაიმართა. როგორც შეხვედრის შემდეგ რუსეთის დელეგაციის ხელმძღვანელმა ვლადიმირ მედინსკიმ განაცხადა, მოლაპარაკებების ახალი რაუნდი უახლოეს დროში გაიმართება. მისი თქმით, დისკუსიები „რთული, მაგრამ საქმიანი იყო“.
აღნიშნულ მოლაპარაკებებში ევროპული ქვეყნების წარმომადგენლები არ მონაწილეობდნენ.
პირველი სამმხრივი მოლაპარაკებები, რომელშიც რუსეთის, აშშ-ისა და უკრაინის წარმომადგენლები მონაწილეობდნენ, აბუ-დაბიში 23-24 იანვარს, მეორე რაუნდი კი 4-5 თებერვალს გაიმართა. ორივე შეხვედრა დახურულ კარს მიღმა, პრესის მონაწილეობის გარეშე ჩატარდა.