თბილისი, 9 თებერვალი — Sputnik. 2026 წლის იანვარში, გასული წლის ანალოგიურ პერიოდთან შედარებით, საქართველოს აეროპორტებში მგზავრთნაკადი 16%-ით, რეისების რაოდენობა კი 16,7%-ით გაიზარდა, ნათქვამია ეკონომიკის სამინისტროს მიერ გავრცელებულ განცხადებაში.
გარდა ამისა, 2025 წლის ანალოგიურ პერიოდთან შედარებით, გაიზარდა გადაზიდული ტვირთების მოცულობაც - მაჩვენებელი 38%-იან ნიშნულს მიუახლოვდა.
მიმდინარე წლის პირველ თვეში საქართველოს აეროპორტები 613, 9 ათასს მგზავრს მოემსახურნენ.
ქვეყნის საერთაშორისო აეროპორტების ჭრილში ჩაშლილი მაჩვენებლები ასეთია:
თბილისის საერთაშორისო აეროპორტი - 430 034 მგზავრი,
ქუთაისის საერთაშორისო აეროპორტი - 138 028 მგზავრი,
ბათუმის საერთაშორისო აეროპორტი – 44 894 მგზავრი.
2026 წლის იანვარში გადაზიდული ტვირთების მოცულობამ 3147,16 ტონა შეადგინა – ზრდა 2025 წლის ანალოგიურ პერიოდთან შედარებით 38,75%-ია.
ამასთან, 9,56%-ით გაიზარდა საქართველოს საჰაერო სივრცის გამოყენების მაჩვენებელი - 2026 წლის იანვარში 24.387 რეისი დაფიქსირდა.
2025 წელს საავიაციო სექტორმა საჰაერო მიმოსვლის ყველა ძირითადი მიმართულებით რეკორდული ზრდა აჩვენა. გასულ წელს საქართველოს აეროპორტები 8.494,640 მგზავრს მოემსახურენ, რაც მგზავრთნაკადის რეკორდული მაჩვენებელი გახდა ქვეყნისთვის.
2025 წელი რეკორდული იყო განხორციელებული ფრენების თვალსაზრისითაც – წლის განმავლობაში საქართველოს აეროპორტებში 38.218 რეისი განხორციელდა, რაც 17,5%-ით აღემატებოდა 2024 წელს განხორციელებულ ფრენებს.