თბილისი, 3 თებერვალი — Sputnik. დღეს, 3 თებერვალს პარლამენტის საგაზაფხულო სესია გაიხსნება.
საკანონმდებლო ორგანოს საგაზაფხულო სესიის პირველი სხდომა სახელმწიფო ჰიმნით გაიხსნება.
კანონმდებლები პირველივე სხდომაზე კენჭს უყრიან სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელ დროებით კომისიის შექმნის საკითხს.
გარდა ამისა, დაჩქარებული წესით განხილვისთვის წარდგენილია „ზოგადი განათლებისა“ და „უმაღლესი განათლების შესახებ“ კანონებში ცვლილებები. სესიამდე გაიმართება განათლების, მეცნიერებისა და ახალგაზრდულ საქმეთა კომიტეტის სხდომა, სადაც კანონპროექტებს პირველი მოსმენით, დაჩქარებული წესით განიხილავენ.
დღევანდელ სხდომაზე განხილვის ერთ-ერთი მთავარი თემა ასევე იქნება ფრაქცია „ქართული ოცნების“ საკანონმდებლო პაკეტი, რომელიც პარტიულ საქმიანობასთან და პოლიტიკურ აქტივობასთან დაკავშირებით ახალი შემზღუდავი კანონების მიღებას ითვალისწინებს.
საგაზაფხულო სესიის ფარგლებში პარლამენტი ქვეყნის მდგომარეობის საკითხებზე პრეზიდენტ მიხეილ ყაველაშვილის მოხსენებას და საპარლამენტო საქმიანობასთან დაკავშირებით პარლამენტის თავმჯდომარე შალვა პაპუაშვილის ანგარიშს მოისმენს.
გარდა ამისა, საგაზაფხულო სესიის ფარგლებში დეპუტატების წინაშე ყოველწლიური ანგარიშით წარდგებიან სახელმწიფო უსაფრთხოების სამსახურის, ეროვნული ბანკის, სახელმწიფო აუდიტის სამსახურის ხელმძღვანელები და გენერალური პროკურორი.
ასევე დაგეგმილია გატარებული რეფორმების შესახებ საქართველოს პრემიერ-მინისტრ ირაკლი კობახიძის ყოველწლიური ანგარიშით წარდგენა.
პარლამენტის საგაზაფხულო სესია ივნისის ბოლო პარასკევს დაიხურება.