იგორ ივანოვმა, რუსეთის საგარეო საქმეთა მინისტრმა მოლაპარაკებებში შუამავლის როლი შეასრულა. მისი მონაწილეობით, ოპოზიციის ლიდერები მაშინდელ პრეზიდენტ ედუარდ შევარდნაძეს თბილისში შეხვდნენ და ხელისუფლების მშვიდობიან გადაცემასა და თანამდებობიდან გადადგომაზე დაითანხმეს.
ამის შემდეგ მიხეილ სააკაშვილი გახდა პრეზიდენტი და თანდათანობით ყოფილი თანამოაზრეები ჩამოიშორა. თუმცა, ამით იგორ ივანოვის მისია საქართველოში არ დასრულებულა. 2004 წელს აჭარის ავტონომიის ლიდერი ასლან აბაშიძე სააკაშვილის რეჟიმს აუჯანყდა. დაპირისპირება მწვავდებოდა, აბაშიძე ძალაუფლების დათმობას არ აპირებდა.
მაშინ იგორ ივანოვს ბათუმში ჩასვლა მოუწია – მოლაპარაკებების შემდეგ მან აბაშიძე მოსკოვში წაიყვანა. სააკაშვილის გუნდის წევრები აჭარის ხელისუფლებაში მოვიდნენ და რეგიონზე კონტროლი დაამყარეს. ამ მოვლენებმა ნათლად აჩვენა რუსეთის გავლენა ქართულ პოლიტიკურ პროცესებზე და მისი ჩარევის მნიშვნელობა, რადგანაც შემდგომი დაპირისპირება, შესაძლოა, დიდ სისხლისღვრაში გადაზრდილიყო.