თბილისი, 15 დეკემბერი — Sputnik. საქართველო მკაცრად გმობს სიდნეიში ანტისემიტურ ტერორისტულ თავდასხმას, რომლის სამიზნეც ებრაული თემის წევრები იყვნენ, დაწერა საქართველოს პრემიერ-მინისტრმა ირაკლი კობახიძემ სოციალურ პლატფორმა X-ზე.
14 დეკემბერს, სიდნეიში მომხდარი სროლის შედეგად 15 ადამიანი დაიღუპა, რომელთა შორის ერთი ბავშვია. მსხვერპლთა ასაკი 10-დან 87-მდე მერყეობს. შემზარავი თავდასხმა ბონდის სანაპიროზე მოხდა, სადაც ებრაულ დღესასწაულს, ხანუკას აღნიშნავდნენ.
„ჩვენ გულწრფელ თანაგრძნობას ვუცხადებთ დაზარალებულებს და დაშავებულებს და სოლიდარობას ვუცხადებთ ავსტრალიის ხალხსა და მთავრობას. ანტისემიტიზმის აქტები ძირს უთხრის ჩვენს საერთო ღირებულებებს და მტკიცედ უნდა დავუპირისპირდეთ მათ, სადაც არ უნდა ხდებოდეს“, - განაცხადა პრემიერმა.
ბოლო ინფორმაციით, ავსტრალიაში, ბონდის სანაპიროზე მომხდარი სროლის შედეგად დაშავებულთა რაოდენობამ 40-ს გადააჭარბა. სამართალდამცველების ცნობით, იდენტიფიცირებული არიან დამნაშავეები. ისინი მამა-შვილი არიან, 50 წლის მამაკაცი სამართალდამცველებმა შემთხვევის ადგილზე სროლის შედეგად მოკლეს. 24 წლის მამაკაცი კი დაჭრილია და საავადმყოფოში იმყოფება პოლიციის მეთვალყურეობის ქვეშ.