თბილისი, 3 დეკემბერი — Sputnik. რუსეთის პრეზიდენტ ვლადიმირ პუტინისა და აშშ-ის პრეზიდენტის სპეცწარმომადგენელ უიტკოფის შეხვედრაზე უკრაინაში აშშ-ის სამშვიდობო გეგმის ყველა ვარიანტი განიხილეს, განაცხადა რუსეთის ლიდერის თანაშემწე იური უშაკოვმა.
„იყო დოკუმენტი, რომელიც შეიცავდა 27 პუნქტს. ის გადმოგვცეს და, ბუნებრივია, გავეცანით, თუმცა ფორმულირებაზე არ გვიმუშავია და არც ჩვენს ამერიკელ კოლეგებთან გვქონია მსჯელობა ამ საკითხზე. შემდეგ მივიღეთ კიდევ რამდენიმე დოკუმენტი, კერძოდ, ოთხი დოკუმენტი, რომლებიც ასევე განიხილეს დღეს ჩვენი პრეზიდენტის, უიტკოფისა და კუშნერის შეხვედრაზე“, — თქვა უშაკოვმა.
როგორც მან აღნიშნა, კრემლში გამართულ მოლაპარაკებებზე მხარეებმა უკრაინაში გრძელვადიანი სამშვიდობო დარეგულირების მიღწევის პერსპექტივებზე ისაუბრეს და განაცხადეს, რომ მზად არიან, კვლავაც განაგრძონ მუშაობა ამ საკითხზე.
უშაკოვის თქმით, წინ ჯერ კიდევ ბევრი სამუშაოა.
რუსეთის პრეზიდენტ პუტინის, აშშ-ის პრეზიდენტის სპეცწარმომადგენლის, სტივ უიტკოფისა და დონალდ ტრამპის სიძის, ჯერად კუშნერის შეხვედრა წუხელ გაიმართა კრემლში და ხუთ საათზე მეტ ხანს გაგრძელდა. მოლაპარაკებების დეტალები უცნობია, მხარეები შეთანხმდნენ, რომ საუბრის შინაარსს არ გაასაჯაროებენ.