თბილისი, 3 დეკემბერი — Sputnik. „სიკეთით სავსე ქალაქი“ - ასეთი იქნება თბილისის 2026 წლის საახალწლო სლოგანი, განაცხადა თბილისის მერმა კახა კალაძემ ქალაქის მთავრობის სხდომაზე.
თბილისის მთავარი ნაძვის ხე წელს პირველი რესპუბლიკის მოედანზე განთავსდება და არა პარლამენტის შენობის წინ - საქალაქო სამსახურები თბილისში საახალწლო ილუმინაციების მონტაჟს აქტიურად ახორციელებენ.
„წლევანდელი საახალწლო სლოგანი იქნება „სიკეთით სავსე ქალაქი. ჩვენი, ყველას საახალწლო სურვილი იქნება - მეტი სიკეთე, სიყვარული და პატივისცემა სუფევდეს ჩვენს ყოველდღიურობაში, რადგან არავის სიამოვნებს ის გარემო და მდგომარეობა, რომელშიც დღეს საზოგადოება იმყოფება", - განაცხადა კალაძემ.
როგორც კალაძემ აღნიშნა, საახალწლო სლოგანები ძირითადად უკავშირდება წლის მიხედვით მიღწეულ შედეგებს, წარმატებებსა და იმ სულისკვეთებას, რომელიც საზოგადოებას ქალაქის მიმართ ამოძრავებს.
„მსოფლიოში და ჩვენს ქვეყანაში მიმდინარე პროცესების გათვალისწინებით, ვფიქრობ, ყველაზე მეტად რაც გაგვაძლიერებს, რაც მთავარი მამოძრავებელი ძალა და მოტივატორია ყველა კარგი საქმის კეთების დროს – ეს არის სიკეთე. ვფიქრობ, უფრო მეტი სიკეთე გვმართებს ერთმანეთის, ჩვენი ქალაქის, გაჭირვებაში მყოფი ადამიანების, განსხვავებული პოლიტიკური აზრის მქონე მოქალაქეების მიმართ", - განაცხადა კალაძემ.
თბილისის საახალწლო სლოგანი უკვე ტრადიციად იქცა. 2018 წელს ეს იყო „სიყვარულით სავსე ქალაქი“, 2020 წელს - „თბილისი - სოლიდარობით სავსე ქალაქი“, 2021 წელს - „სიცოცხლით სავსე ქალაქი“ და 2022 წელს - „მშვიდობით სავსე ქალაქი“.
თბილისის მერიის მიერ გავრცელებული ინფორმაციით, დედაქალაქის მთავარი ნაძვის ხე და ქალაქის მასშტაბით საახალწლო ილუმინაციები 12 დეკემბერს საზეიმოდ აინთება.
12 დეკემბრიდან 7 იანვრის ჩათვლით პერიოდში თბილისის მერია მრავალფეროვან, გასართობ და სანახაობრივ ღონისძიებებს გეგმავს. თემატურად მოწყობილი საახალწლო სივრცეები ტრადიციულად დატვირთული იქნება კულტურული, საგანმანათლებლო, საბავშვო, სხვადასხვა თემატური აქტივობებით.
„სპეციალურად დღესასწაულისთვის მორთული პირველი რესპუბლიკის მოედანი კი სწორედ 12 დეკემბრიდან უმასპინძლებს თბილისელებს და თბილისის სტუმრებს. კიდევ ერთხელ მინდა, მოვუწოდო კერძო კომპანიებისა და ბიზნესსექტორის წარმომადგენლებს, რომ ტრადიციულად ერთად ვიზრუნოთ ჩვენი ქალაქის საახალწლო იერსახის შექმნაზე, როგორც „საახალწლო სოფელში“, ისე ქალაქის მასშტაბით არსებულ სკვერებსა და პარკებში“, - განაცხადა კალაძემ.
კახა კალაძემ მომავალ წელს მოსახლეობას სიკეთე, სულიერი სიმშვიდე და თავისუფალ ქვეყანაში ცხოვრება უსურვა.
წელს თბილისის ხელისუფლება საახალწლო ილუმინაციებსა და ახალი წლის ღამის გალა-კონცერტზე 8,3 მლნ ლარის დახარჯვას გეგმავს.