თბილისი, 30 ნოემბერი - Sputnik. უნგრეთის დედაქალაქ ბუდაპეშტში მიმდინარე 23-წლამდე მოკრივეთა ევროპის ჩემპიონატზე საქართველოს ნაკრების წევრმა ლუკა ნიქაბაძემ ვერცხლის მედალი მოიპოვა. ამის შესახებ ინფორმაციას საქართველოს სპორტის სამინისტრო ავრცელებს.
ფინალურ შეხვედრამდე ნიქაბაძემ ბულგარელი რუმენ რუმენოვი, ისრაელის წარმომადგენელი იეჰორ ნოვიკოვი დაამარცხა, ნახევარფინალში კი ბერძენ ზაქარია მილონას სძლია.
70კგ წონით კატეგორიის ფინალში კი ნიქაბაძე რუმინელ რაჯ სტოიკანთან დამარცხდა და შეჯიბრებაზე მეორე ადგილი დაიკავა.
ტურნირზე ასპარეზობა საქართველოს 23-წლამდელთა ნაკრებმა სამი - ორი ბრინჯაოსა და ერთი ვერცხლის - მედლით დაასრულა. ბრინჯაოს მედლები მოკრივეებმა - ჰურამან კასუმოვამ (-57 კგ) და გორ აივაზიანმა (-55 კგ) - მოიპოვეს.