თბილისი, 30 ნოემბერი — Sputnik. კოალიცია „ლელო - ძლიერი საქართველოს“ ერთ-ერთ ლიდერ ალეკო ელისაშვილის საქმე საქართველოს უსაფრთხოების სამსახურს გადაეცა, შესაძლოა, ჩემი დაცვის ქვეშ მყოფის ბრალდება გადაუკვალიფიცირდეს, განაცხადა ადვოკატმა გიორგი რეხვიაშვილმა.
შსს-მ პოლიტიკოსი, რომელმაც თბილისის საქალაქო სასამართლოს კანცელარიის შენობის დაწვა სცადა, 29 ნოემბერს დააკავა.
„მოგვეცა საშუალება, რომ გავცნობოდით ბრალის დადგენილებას. როგორც ჩვენთვის გახდა ცნობილი, ალექსანდრე ელისაშვილს ედავებიან ტერორიზმს, ეს არის სისხლის სამართლის დანაშაული. სსკ-ის 19- 323 პირველი ნაწილი, რაც ითვალისწინებს 10-დან 15 წლამდე პატიმრობას",- განაცხადა ადვოკატმა ჟურნალისტებთან.
მისი თქმით, ელისაშვილის მიმართ თავდაპირველად გამოძიება დაწყებული იყო სსკ-ის 187-ე მუხლის მეორე ნაწილით, რომელიც სხვისი ქონების დაზიანებას გულისხმობს და სამიდან ექვს წლამდე ვადით თავისუფლების აღკვეთას ითვალისწინებდა.
ადვოკატის განმარტებით, ელისაშვილი ბრალს არ აღიარებს და მიაჩნია, რომ მის მიერ ჩადენილი ქმედება იყო მხოლოდ პროტესტის გამოხატვის გააზრებული ფორმა.
გამოძიების ცნობით, მიმდინარე წლის 29 ნოემბრის გამთენიისას შენიღბულმა ალექსანდრე ელისაშვილმა ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის შუშა, შეაღწია სასამართლოს კანცელარიის შიდა სივრცეში და პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა.
შსს-ის ინფორმაციით, ელისაშვილისთვის ხელის შეშლა სასამართლოს მანდატურებმა სცადეს, რომლებსაც პოლიტიკოსმა მის ხელთ არსებული ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა.
შსს-ს მტკიცებით, დაკავებისას გაწეული წინააღმდეგობის გამო ალექსანდრე ელისაშვილმა დაზიანებები მიიღო, ერთ-ერთი მანდატური კი სამედიცინო დაწესებულებაშია გადაყვანილი.