თბილისი, 29 ნოემბერი - Sputnik. ახალქალაქში საკონტრაქტო სამსახურსა და წვევამდელთა ეროვნულ სამხედრო სამსახურში გაწვეულმა რეკრუტებმა სამხედრო ფიცი დადეს, ნათქვამია თავდაცვის სამინისტროს მიერ გავრცელებულ განცხადებაში.
ფიცის დადების საზეიმო ცერემონიალს, რომელიც ახალქალაქში ზაზა ფერაძის სახელობის საწყისი საბრძოლო მომზადების ცენტრში გაიმართა, საწყისი საბრძოლო მომზადების კურსის ხელმძღვანელობა და რეკრუტების ოჯახის წევრები დაესწრნენ. წარჩინებულ რეკრუტებს სერტიფიკატები გადაეცათ.
წვევამდელები საკონტრაქტო სამხედრო სამსახურსა და წვევამდელთა ეროვნულ სამხედრო სამსახურში 11 თვის ვადით არიან გაწვეული.
უწყების ცნობით, საწყისი საბრძოლო მომზადების კურსის ფარგლებში რეკრუტებმა შეისწავლეს პირველადი სამედიცინო დახმარება და ტაქტიკური მომზადება, ტოპოგრაფია, კავშირგაბმულობა და საცეცხლე მომზადება. დღეიდან საკონტრაქტო სამხედრო სამსახურის რეკრუტები თავდაცვის ძალების სხვადასხვა ქვედანაყოფში გადანაწილდებიან.
რაც შეეხება ეროვნულ სამხედრო სამსახურში 11 თვის ვადით ჩარიცხულ წვევამდელებს, კურსის მსვლელობისას ინსტრუქტორებმა და კურსის ხელმძღვანელობამ შეაფასა მათი სამეთაურო-ლიდერული უნარჩვევები. შეფასების მიხედვით შეირჩა 33 სამხედრო მოსამსახურე გორის ეროვნული თავდაცვის აკადემიაში ოცეულის მეთაურის მომზადების 23 კვირიანი კურსის გასავლელად. დანარჩენები კი სამეთაურო მომზადების კურსს გიორგი ანწუხელიძის სერჟანტთა აკადემიაში გაივლიან.
თავდაცვის ახალი კოდექსის ამოქმედების შემდეგ, ეროვნულ სამხედრო სამსახურში წვევამდელების 11 თვის ვადით გაწვევის ეს პირველი შემთხვევაა. წვევამდელების უმრავლესობა ნებაყოფლობით გამოცხადებული სტუდენტები და უმაღლესდამთავრებულები არიან.
სამხედრო სამსახური
საქართველოში სავალდებულო სამხედრო სამსახურში გაწვევას 18–დან 27 წლამდე მამაკაცები ექვემდებარებიან.
ჯარში სამსახურის პოპულარიზაცია თავდაცვის სამინისტროს ერთ-ერთ მთავარ პრიორიტეტს წარმოადგენს. განახლებული "თავდაცვის კოდექსი" 2025 წლიდან ამოქმედდა. სიახლეები შეეხო როგორც სავალდებულო სამსახურს, ისე საკონტრაქტო სამსახურს და საქართველოს თავდაცვის ძალების სტრუქტურას.
2025 წლიდან გაწვევა ხორციელდება მხოლოდ წვევამდელთა ეროვნულ სამხედრო სამსახურში წვევამდელთა სიიდან შემთხვევითი შერჩევის პრინციპით.
წვევამდელთა სამსახური ანაზღაურებადია, ასევე გათვალისწინებულია შვებულებები და დასვენების დღეები. წვევამდელი თავად ირჩევს სამსახურის გავლის სამიდან ერთ-ერთ ვარიანტს:
სამსახური საბრძოლო ქვედანაყოფში – ექვსი თვე:
სამსახური დაცვისა და უზრუნველყოფის ქვედანაყოფებში – რვა თვე;
სამსახური უმცროსი სამეთაურო წოდების მისაღებად და გარკვეული სპეციალობის დაუფლებისთვის – 11 თვე.
გადავადება შესაძლებელია მხოლოდ ერთხელ და ის 5 ათასი ლარი დაჯდება.
მანამდე არსებული კანონმდებლობით, წვევამდელთა სამსახური მოიცავდა ერთ წელიწადს და შვებულებას არ ითვალისწინებდა.