თბილისი, 28 ნოემბერი — Sputnik. საქართველო მეორედ ემზადება 2025 წლის საბავშვო ევროვიზიის სიმღერის კონკურსის მასპინძლობისთვის, რომლის ფინალიც 13 დეკემბერს, თბილისში გაიმართება.
კონკურსში 18 ევროპული ქვეყნის წარმომადგენელი მიიღებს მონაწილეობას, მათ შორის 10 წლის საქართველოს წარმოდგენილი ანიტა აბგარიანი. კონკურსი საღამოს 20:00 საათზე დაიწყება.
„პირველი არხის“ გენერალური დირექტორის, თინათინ ბერძენიშვილის თქმით, კონკურსისთვის მზადება აქტიურად მიმდინარეობს.
„ეს არ არის მხოლოდ ერთი კონცერტი, ეს არის კვირეული, რომელიც დაიწყება პირველი დეკემბრიდან. გვექნება ორი კონცერტი – ორი დუბლირებული, თითოეულ კონცერტს დაესწრება 3 000-მდე ბავშვი, მოისმენს, უყურებს, შეაფასებს ჟიურისთან ერთად. მეორე კონცერტი იქნება 18 ქვეყნის წამყვანი მაუწყებლობის პირდაპირ ეთერში. ვფიქრობ, ჩვენი ბავშვები იქნებიან ყველაზე ბედნიერები წინასახალწლოდ“, - განაცხადა ბერძენიშვილმა.
როგორც კულტურის მინისტრმა თინათინ რუხაძემ განაცხადა, ქვეყნისთვის დიდი პატივია, რომ „ევროვიზია“ საქართველოში მეორედ ტარდება.
„მიხარია, რომ საბავშვო ევროვიზიაზე საქართველოს ისეთი შედეგი აქვს, როგორიც არცერთ ქვეყანას. ჩვენი ბავშვების ნიჭიერება მსოფლიოს ალაპარაკებს. რასაკვირველია, ძალიან საამაყოა, რომ უკვე მეორედ ტარდება საქართველოში საბავშვო ევროვიზია… ქვეყნისთვის ეს არის მზარდი ტურიზმი, ეკონომიკის მდგრადი და უწყვეტი განვითარება. ეს ყველაფერი ერთმანეთშია გადაჯაჭვული და, ბუნებრივია, საქართველოს მთავრობა მხარს უჭერს განვითარებას, პროგრესს“, - განაცხადა რუხაძემ.
კონკურსის ფინალზე ბილეთების გაყიდვა 1 დეკემბერს 14:00 საათზე დაიწყება.
თბილისში პირველად კონკურსი 2017 წელს ჩატარდა. საქართველო "საბავშვო ევროვიზიაში" 2007 წლიდან მონაწილეობს და კონკურსის ისტორიაში ყველაზე წარმატებული მონაწილე ქვეყანაა, რომელსაც ოთხჯერ აქვს კონკურსი მოგებული – 2008, 2011, 2016 და 2024 წლებში.
გასულ წელს "საბავშვო ევროვიზია" საქართველოს წარმომადგენელმა, 11 წლის ანდრია ფუტკარაძემ მოიგო. მან 239 ქულით ქვეყანას მეოთხე გამარჯვება მოუტანა. აღნიშნული შედეგით საქართველო კონკურსის რეკორდსმენი გახდა.