როგორ შეიცვალა ფასები სამრეწველო პროდუქციაზე – ახალი სტატისტიკა

თბილისი, 28 ნოემბერი — Sputnik. სამრეწველო პროდუქციის მწარმოებელთა ფასების ინდექსი 2025 წლის ოქტომბერში, 2024 წლის ანალოგიურ პერიოდთან შედარებით, 5,6%-ით გაიზარდა, ნათქვამია საქართველოს სტატისტიკის ეროვნული სამსახურის „საქსტატის" მასალებში.

ინდექსის ფორმირებაზე ძირითადად გავლენა იქონია ფასების ზრდამ გადამამუშავებელ მრეწველობაში – 3,9%-ით, მათ შორის ფასები სურსათზე გაიზარდა – 9,7%–ით, ხოლო სამთო-მომპოვებელ მრეწველობაში ფასები გაიზარდა 21,7%-ით.

2025 წლის ოქტომბერში, სექტემბერთან შედარებით, ფასები სამრეწველო პროდუქციაზე 1,1%-ით გაიზარდა.

საქართველოში წარმოებულ შიდა ბაზრისთვის გათვლილ პროდუქციაზე ფასები ოქტომბერში, 2024 წლის ანალოგიურ პერიოდთან შედარებით, 4,6%-ით გაიზარდა.

ამასთან სამთო-მომპოვებელ მრეწველობაში ფასები შემცირდა 4,1%-ით, გადამამუშავებელ მრეწველობაში კი 4,6%-ით გაიზარდა.

ექსპორტზე გატანილი სამრეწველო პროდუქციის ფასების ინდექსი ოქტომბერში, 2024 წლის ანალოგიურ პერიოდთან შედარებით, 7,1%-ით გაიზარდა.

სამთო-მომპოვებელი მრეწველობის პროდუქციაზე ფასები 29,3%-ით გაიზარდა. გადამამუშავებელი მრეწველობის ექსპორტირებულ პროდუქციაზე ფასები გაიზარდა 2,6%-ით.

საქართველოში იმპორტირებულ სამრეწველო პროდუქციაზე ფასები საანგარიშო პერიოდში 1,5%-ით გაიზარდა. ამასთან, გადამამუშავებელი მრეწველობის იმპორტირებული პროდუქცია 1,4%-ით გაძვირდა, მათ შორის საკვები პროდუქტები - 11,9%-ით.

წლიური ინფლაციის დონემ 2025 წლის ოქტომბერში 5,2% შეადგინა (მიზნობრივი მაჩვენებელია 3%). მიმდინარე წლის ოქტომბერში, სექტემბერთან შედარებით, ინფლაციის დონემ 0,6% შეადგინა.