თბილისი, 28 ნოემბერი — Sputnik. საერთაშორისო მნიშვნელობის თბილისი–სენაკი–ლესელიძის ავტომაგისტრალის 26-ე კილომეტრზე, არაგვის ძველი ხიდის მიმდებარედ გრძელდება მეორე ხიდის მშენებლობა, ნათქვამია საავტომობილო გზების დეპარტამენტის მიერ გავრცელებულ განცხადებაში.
უწყების ცნობით, არსებული ხიდი, რომელიც 1973 წელს აშენდა, ხშირად საჭიროებდა აღდგენით სამუშაოებს, რაც დროებით ზღუდავდა მოძრაობას და დისკომფორტს უქმნიდა მგზავრებს.
ამ ეტაპზე დასრულებულია ახალი ხიდის 4 ბურჯის მშენებლობა, მეხუთე ბურჯი დასრულების ფაზაშია. პარალელურად, მიმდინარეობს 73-მეტრიანი ლითონის კოჭების მონტაჟი.
"პროექტის დასრულების შემდეგ ახალი ხიდი არსებითად გააუმჯობესებს მოძრაობის უსაფრთხოებასა და გამტარიანობას ერთ-ერთ ყველაზე დატვირთულ საავტომობილო მონაკვეთზე", - ნათქვამია განცხადებაში.
უწყების ცნობით, ახალი ხიდი არა მხოლოდ სატრანსპორტო უსაფრთხოებას გააძლიერებს, არამედ საქართველოს სატრანზიტო ფუნქციასაც მნიშვნელოვნად გაამყარებს.
პროექტი სახელმწიფო ბიუჯეტიდან ფინანსდება, მისი სავარაუდო ღირებულება 20 მლნ ლარია.