თბილისი, 23 ნოემბერი — Sputnik. ქვეშეთი-კობის გზაზე სამშენებლო კომპანიის 5 თანამშრომელი ჩამოშლილი მიწის მასის ქვეშ მოყვა, ნაპოვნია ოთხი ცხედარი, ერთი პირი გადაყვანილია კლინიკაში, ნათქვამია საავტომობილო გზების დეპარტამენტის განცხადებაში.
უწყების ცნობით, აღნიშნული პირები - თურქმენეთისა და ჩინეთის მოქალაქეები - სოფელ წკერესთან, საყრდენი კედლის მოწყობის სამუშაოებს ახორციელებდნენ.
„ადგილზე მობილიზებული არიან საგანგებო სიტუაციების მართვის სამსახურის ჯგუფები და საავტომობილო გზების დეპარტამენტის წარმომადგენლები", - ნათქვამია განცხადებაში.
მომხდარ ფაქტზე დაწყებულია გამოძიება.
როგორც განცხადებაშია აღნიშნული, საავტომობილო გზების დეპარტამენტი კონტრაქტორი კომპანიისგან მოითხოვს უსაფრთხოების ნორმების დაცვის მაქსიმალურ გამკაცრებას და სამუშაო წარმოებისას რეგულაციების მკაცრად დაცვას.
უწყება თანაგრძნობას უცხადებს დაღუპულთა ოჯახებს.