თბილისი, 21 ნოემბერი — Sputnik. საქართველოს ეროვნული საფეხბურთო ნაკრები პატივისცემას იმსახურებს, გამარჯვების ან დამარცხების მიუხედავად, და შეურაცხყოფა მათი მისამართით მიუღებელია, განაცხადა თბილისის მერმა კახა კალაძემ.
საქართველოს ეროვნულმა საფეხბურთო ნაკრებმა 2026 წლის მსოფლიო ჩემპიონატის შესარჩევი ეტაპის ბოლო მატჩი ბულგარეთის წინააღმდეგ ჩაატარა და ანგარიშით 2-1 წააგო. მატჩი ჯგუფიდან გასვლაზე მნიშვნელოვან გავლენა ვერ მოახდენდა, თუმცა ეს შესარჩევ ეტაპზე გუნდის ზედიზედ მეოთხე მარცხი იყო. ფეხბურთელები ოპოზიციისა და საზოგადოების ნაწილის კრიტიკის სამიზნე გახდნენ.
„ვინც ჩვენი ეროვნული ნაკრების წევრებს ლანძღავს, სამარცხვინოები და გაბოროტებული ადამიანები არიან, რომლებსაც არც ქვეყნის და მათ შორის არც ნაკრების წარმატება არ უხარიათ“, - განაცხადა კალაძემ.
კალაძის თქმით, ნაკრების ფეხბურთელების მისამართით ბოლო დღეებში შეურაცხმყოფელი განცხადებები ისმის, რაც, მისი თქმით, არასწორია, რადგან ამ ფეხბურთელებმა ქართული ფეხბურთი ახალ დონეზე აიყვანეს.
„ამიტომ ერჩიან წარმატებულ ხალხს, მათ შორის ჩვენს ფეხბურთელებს. ამ ხალხს არც ადრე უხაროდათ ჩვენი ნაკრების წარმატება და გამარჯვებები. ისინი გაბოროტებულ დაჯგუფებას წარმოადგენენ და ქვეყნის ყველა წარმატებას ებრძვიან“, - განაცხადა კალაძემ.
2026 წლის მსოფლიო ჩემპიონატის შესარჩევი ეტაპის მატჩი საქართველოსა და ესპანეთის ეროვნულ საფეხბურთო ნაკრებებს შორის
© photo: Sputnik / Stringer
რაც შეეხება ეროვნულ ნაკრებს, მერმა აღნიშნა, რომ არის როგორც წარმატებული თამაშები, ასევე წარუმატებელიც.
„სხვანაირად შეუძლებელია. ეს ფეხბურთია და ყოველთვის ვერ მოიგებ. თუმცა, ჩვენ ჩვენი გუნდი და ჩვენი ბიჭები, წაგებისა და მოგების მიუხედავად, გვიყვარს, პატივს ვცემთ. ისინი არიან ახალგაზრდები, ვინც ქართული ფეხბურთის სიყვარული დააბრუნეს და განსხვავებულ ნიშნულზე აიყვანეს“, - განაცხადა მერმა.
მისი თქმით, ყველას უხაროდა ეროვნული ნაკრების დიდი მიღწევა - ევროპის ჩემპიონატზე გასვლა, თუმცა წაგების გამო შეურაცხყოფის მიყენება არასწორია.
„შემდეგ წელს გუნდმა რამდენიმე თამაში რომ წააგო, ამის გამო ფეხბურთელები ლანძღო და შეურაცხყოფა აყენო, სწორი არაა“, - განაცხადა თბილისის მერმა.
2023 წელს საქართველოს ეროვნულმა ნაკრებმა ერთა ლიგის C დივიზიონის გამარჯვებული გახდა და ევროპის ჩემპიონატის საკვალიფიკაციო ეტაპის პლეი-ოფში ადგილი მოიპოვა, სადაც ფინალში საბერძნეთი პენალტების სერიაში დაამარცხა და „ევრო 2024“-ის საგზური მოიპოვა. გერმანიაში გამართულ ევროპის ჩემპიონატზე საქართველოს ეროვნული ნაკრები ჯგუფური ეტაპიდან გავიდა და მერვედფინალში ითამაშა.
გუნდმა ჯგუფურ ეტაპზე 4 ქულა დააგროვა: დაამარცხა პორტუგალია (2-0), ჩეხეთთან ფრედ ითამაშა (1-1) და სადებიუტო მატჩში თურქეთთან წააგო (1-3).
ევროპის ჩემპიონატის მერვედფინალში საქართველო ჩემპიონატის ერთ-ერთ ლიდერ ესპანეთთან დამარცხდა (1-4).