თბილისი, 18 ნოემბერი — Sputnik. საქართველოს ეროვნული საფეხბურთო ნაკრები მსოფლიო ჩემპიონატის შესარჩევი ეტაპის ბოლო მატჩს სოფიაში, ბულგარეთის ნაკრების წინააღმდეგ გამართავს.
შეხვედრა თბილისის დროით 23:45 საათზე დაიწყება.
მანამდე, ეროვნულმა ნაკრებმა ბულგარეთის გუნდი 7 სექტემბერს, „დინამო არენაზე" ანგარიშით 3:0 დაამარცხა.
საქართველოსა და ბულგარეთის გუნდები ერთმანეთს რვაჯერ დაუპირისპირდნენ. საქართველომ სამჯერ გაიმარჯვა, ორი მატჩი ფრედ დასრულდა, ხოლო ოთხჯერ გამარჯვება ბულგარეთის ნაკრებს დარჩა.
საქართველომ ყველაზე დიდი გამარჯვება ბულგარეთის ნაკრებთან 1995 წელს, „ევრო 1996"-ის შესარჩევ ეტაპზე მოიპოვა. მსოფლიო ჩემპიონატზე მეოთხე ადგილზე გასული ნაკრები ქართველმა ფეხბურთელებმა თბილისში ანგარიშით 2:1 დაამარცხეს, გოლები შოთა არველაძემ და გიორგი ქინქლაძემ გაიტანეს.
მნიშვნელოვანი იყო საქართველოს ნაკრების გამარჯვება ბულგარეთთან 2022 წელს ერთა ლიგის C დივიზიონში. რაზგრადში გამართული მატჩი ქართველმა ფეხბურთელებმა ანგარიშით 5:2 მოიგეს. აღნიშნულ ჯგუფში წარმატებით თამაშის შემდეგ საქართველოს ნაკრები პლეი-ოფში გავიდა და, საბოლოოდ, „ევრო 2024"-ის ფინალური ეტაპის საგზური მოიპოვა.
ხუთი მატჩის შემდეგ, საქართველოს ნაკრები სამი ქულით E ჯგუფში მესამე ადგილზეა და მსოფლიო ჩემპიონატზე საკვალიფიკაციო ეტაპით გასვლის შანსი დაკარგა. პირველ ადგილზე, 15 ქულით ესპანეთია, თურქეთი - 12 ქულით მეორეზე ადგილზეა, საქართველო – 3 ქულით მესამეზე, ბულგარეთი კი მეოთხეზე (0 ქულა) ადგილზეა.