თბილისი, 13 ოქტომბერი – Sputnik. აშშ-ის მიერ უკრაინისთვგის Tomahawk-ის ტიპის ფრთოსანი რაკეტების მიწოდება შეიძლება ყველასთვის ცუდად დასრულდეს, განაცხადა რუსეთის უშიშროების საბჭოს თავმჯდომარის მოადგილე დმიტრი მედვედევმა.
მედვედევმა გაიხსენა აშშ-ის პრეზიდენტ დონალდ ტრამპის მიერ რუსი კოლეგა ვლადიმირ პუტინის გაფრთხილების შესახებ - თუ იგი არ დაარეგულირებს უკრაინის კონფლიქტს, რა შედეგები მოჰყვება ამას.
„თუ „ბიზნეს-მშვიდობისმყოფელი“ “ტომაჰავკის” რაკეტებს გულისხმობს, ფრაზა არასწორია. ამ რაკეტების მიწოდება ყველასთვის შეიძლება ცუდად დასრულდეს, და უპირველეს ყოვლისა, თავად ტრამპისთვის“, - დაწერა მედვედევმა თავის Telegram-არხზე.
მან ასევე აღნიშნა, რომ ფრენის დროს შეუძლებელია ბირთვული Tomahawk-ის რაკეტის ჩვეულებრივი რაკეტისგან გარჩევა და რომ მათ არა უკრაინა, არამედ აშშ გაუშვებს, ამიტომაც რუსეთს პასუხის გაცემა მოუწევს.
მედვედევმა იმედი გამოთქვა, რომ ტრამპის სიტყვები ვოლოდიმირ ზელენსკისთან გაჭიანურებული მოლაპარაკებებით გამოწვეული კიდევ ერთი ცარიელი მუქარაა.
Tomahawk-ის რაკეტების მიწოდება
გასულ კვირაში აშშ-ის პრეზიდენტმა დონალდ ტრამპმა განაცხადა, რომ თითქმის მიიღო გადაწყვეტილება უკრაინისთვის Tomahawk-ის ტიპის რაკეტების მიწოდების შესახებ, თუმცა სურს იცოდეს, როგორ აპირებს კიევი მათ გამოყენებას.
აშშ-ის პრეზიდენტის სპეცწარმომადგენელმა კიტ კელოგმა დაადასტურა, რომ ვოლოდიმირ ზელენსკიმ ტრამპს 1800 კმ-მდე მოქმედების რადიუსის მქონე ფრთოსანი რაკეტების (BGM-109 Tomahawk) მიღების თხოვნით მიმართა.
როგორც რუსეთის ლიდერმა ვლადიმირ პუტინმა 5 ოქტომბერს განაცხადა, აშშ-დან უკრაინაში Tomahawk-ის ან სხვა შორი მოქმედების იარაღის შესაძლო მიწოდება რუსეთ-ამერიკის ურთიერთობების განადგურებას გამოიწვევდა.