თბილისი, 12 სექტემბერი — Sputnik. დედაქალაქის მერმა კახა კალაძემ საბურთალოს, გლდანის, ნაძალადევის, სამგორის, კრწანისის, ჩუღურეთისა და ისნის რაიონებში მცხოვრებ 27 ოჯახს საკუთრების დამადასტურებელი დოკუმენტები გადასცა. ამის შესახებ ინფორმაციას თბილისის მერია ავრცელებს.
წლობით დაუკანონებელი საცხოვრებელი ფართების საკუთრებაში გადაცემის პროცესი 2017 წლიდან კახა კალაძის ინიციატივით დაიწყო. დედაქალაქის მერიაში ფართების დაკანონების მსურველთა ასობით განაცხადია შესული, რომელთა განხილვა და დაკმაყოფილება ეტაპობრივად მიმდინარეობს.
ფართები, რომლებშიც ადამიანები წლების განმავლობაში ყოველგვარი საკუთრების დამადასტურებელი საბუთების გარეშე ცხოვრობენ, ოჯახებს სიმბოლურ ფასად – ერთ ლარად გადაეცათ.
„ვულოცავ ამ ადამიანებს. მათთან ერთად მეც ბედნიერი ვარ. დიდი ხანია, ელოდნენ ამ გადაწყვეტილებას. დღეს უკვე გადავეცით საკუთრების დამადასტურებელი მოწმობები. აღნიშნული პროგრამა წარმატებით მუშაობს. ასეულობით მილიონი ლარის ქონება არის არის გადაცემული კერძო საკუთრებაში, რომელიც სახელმწიფოს ბალანსზე იყო", – განაცხადა კახა კალაძემ.
როგორც თბილისის მერმა განაცხადა, აღნიშნული პროგრამა იმ დრომდე გაგრძელდება, ვიდრე ყველა ადამიანი, რომელიც ამ პრობლემის წინაშე დგას, არ იქნება საცხოვრებელი ფართით უზრუნველყოფილი.
საცხოვრებელ ფართში ხანგრძლივი დროით მცხოვრებ ადამიანებს შეუძლიათ მიმართონ თავიანთი რაიონის გამგეობას, სადაც მოხდება მოკვლევა. გამგეობაში წარსადგენად საჭიროა მოქალაქის განცხადება დაკავებული ფართის მისამართის და საკადასტრო კოდის მითითებით. ასევე მეზობლების ნოტარიულად დამოწმებული თანხმობა, რომელშიც დასტურდება პირის მისამართზე ცხოვრების ფაქტი და ხანგრძლივობა.
ასევე საჭიროა ცნობა საჯარო რეესტრიდან პირის და მისი ოჯახის წევრების ქონებრივი მდგომარეობის შესახებ. აღნიშნული პროგრამა არ შეეხება სახელმწიფოს კუთვნილ ტერიტორიაზე უკანონო მშენებლობების მეპატრონეებს.
2017 წელს დაწყებული პროგრამის ფარგლებში საცხოვრებელი ფართები 3,3 ათასზე მეტ ოჯახს დაუკანონდა.