თბილისი, 10 სექტემბერი — Sputnik. პარტია „სოლიდარობა მშვიდობისთვის“ გეგმავს რუსეთის პრეზიდენტ ვლადიმირ პუტინს საქართველოს მოქალაქეებისთვის რუსეთის მოქალაქეობის მინიჭების თაობაზე თხოვნით მიმართოს, განუცხადა რუსულ მედიას პარტიის საერთაშორისო მდივანმა მამუკა ფიფიამ.
პოლიტიკოსის თქმით, „ქართულ საზოგადოებაში ასეთი მოთხოვნა არსებობს“ და საუბარია საქართველოს მოქალაქეების რამდენიმე კატეგორიაზე, რომელთა ბედიც მჭიდროდ არის გადაჯაჭვული საბჭოთა წარსულთან.
„უახლოეს მომავალში მივმართავთ რუსეთის პრეზიდენტს თხოვნით, რომ რუსეთის ფედერაციის მოქალაქეობა მიანიჭოს მოქალაქეთა რამდენიმე კატეგორიას: მათ, ვინც მუშაობდა ან მსახურობდა საბჭოთა საწარმოებში, მათ, ვინც მუშაობდა ან მსახურობდა მთელი საბჭოთა კავშირის ტერიტორიაზე და ასევე მათ, ვინც დაიბადა სსრკ-ში“, - განაცხადა ფიფიამ.
მამუკა ფიფიას თქმით, პოლიტიკური მოძრაობა დაინტერესებულია რუსეთთან ურთიერთობების განმტკიცებით.
რუსეთი და საქართველო
რუსეთმა საქართველოს მოქალაქეებისთვის სავიზო რეჟიმი 2000 წელს შემოიღო და 2023 წლის მაისის შუა რიცხვებში გააუქმა. საქართველოს მოქალაქეებს რუსეთში დიპლომატიური, სამსახურებრივი, კერძო, საქმიანი, ტურისტული, ჰუმანიტარული მიზნებისთვის, ასევე მოკლევადიანი სწავლისთვის ვიზის გარეშე დარჩენის უფლება ყოველი 180 დღიდან 90 დღემდე ვადით შეუძლიათ.
მიმდინარე წლის 15 ივნისს პარტიამ „სოლიდარობა მშვიდობისთვის“, რომელიც ორი ქვეყნის ურთიერთობების მოგვარებაში საკუთარი წვლილის შეტანას აქტიურად ცდილობს, რუსეთის პრეზიდენტ ვლადიმირ პუტინს საქართველოს მოქალაქეებისთვის სავიზო რეჟიმის სრულად გაუქმების თხოვნით მიმართა. მიმართვაში ასევე საუბარია საქართველოს იმ მოქალაქეების პასუხისმგებლობისგან გათავისუფლებაზე, რომლებმაც დაარღვიეს რუსეთის ტერიტორიაზე ყოფნის კანონიერი ვადა.
2024 წლის ოქტომბერში რუსეთის პრეზიდენტმა ვლადიმირ პუტინმა ხელი მოაწერა ბრძანებულებას საქართველოს მოქალაქეებისთვის უვიზო რეჟიმის გაფართოების შესახებ, რომლის თანახმადაც რუსეთის ფედერაციაში ვიზის გარეშე საქართველოს მოქალაქეებს შეეძლებათ შევიდნენ „სამუშაო საქმიანობის განსახორციელებლად ან 90 დღეზე მეტი ვადით რუსეთის ფედერაციაში დროებითი ყოფნისთვის, მათ შორის განათლების მიღების მიზნით“.
დიპლომატიური ურთიერთობების არარსებობის მიუხედავად, საქართველო და რუსეთი წლების განმავლობაში წარმატებით ავითარებდნენ სავაჭრო ურთიერთობებს და დღეს რუსეთის ფედერაცია საქართველოს მთავარი სავაჭრო პარტნიორების სიაში მეორე ადგილზეა.
2024 წელს ქვეყნებმა დაახლოებით 2,5 მილიარდი დოლარის საქონლით ივაჭრეს, რაც 5,4%-ით მეტია 2023 წელთან შედარებით. ამასთან, შარშან საქართველოდან რუსეთში ექსპორტი გაიზარდა 3,7%-ით, რუსეთიდან საქართველოში იმპორტი კი გაიზარდა 6%-ით.
მმართველმა პარტია „ქართული ოცნება - დემოკრატიულმა საქართველომ“, რომელიც ხელისუფლებაში 2012 წლის არჩევნების შედეგად მოვიდა, საგარეო პოლიტიკის ერთ-ერთ მთავარ პრიორიტეტად დაასახელა რუსეთთან ურთიერთობების ნორმალიზება, მაგრამ არა ქვეყნის ტერიტორიული მთლიანობის ხარჯზე.
საქართველოსა და რუსეთს შორის დიპლომატიური ურთიერთობები არ არსებობს. საქართველომ ის 2008 წლის აგვისტოს ომის შემდეგ, მოსკოვის მიერ აფხაზეთისა და ცხინვალის რეგიონის სუვერენიტეტის აღიარების შემდეგ გაწყვიტა.
დღეისთვის საქართველოსა და რუსეთს შორის დიალოგი მხოლოდ ჟენევის დისკუსიებისა და პრაღის რეგულარული შეხვედრების ფარგლებშია შენარჩუნებული, რომლებსაც საქართველოს პრემიერ-მინისტრის სპეცწარმომადგენელი გიორგი ქაჯაია და რუსეთის დუმის ფედერაციის საბჭოს წევრი გრიგორი კარასინი მართავენ.